గూడూరులో నిరుద్యోగ యువతకు ఘనంగా జాబ్ మేళా

బీబీనగర్ మండల పరిధిలోని గూడూరు,గ్రామంలోని నిరుద్యోగ యువతీ యువకులకు ఉపాధి అవకాశాలు కల్పించాలనే లక్ష్యంతో గూడూరు గ్రామ సర్పంచ్ బింగి అలివేలు మంగ శ్రీనివాస్ ఆధ్వర్యంలో, ఆదిత్య ఎంటర్‌ప్రైజెస్ సహకారంతో సోమవారం గ్రామపంచాయతీ ఆవరణంలో జాబ్ మేళా నిర్వహించారు. పదవ తరగతి,ఇంటర్,డిగ్రీ విద్యార్హతలు కలిగిన యువతీ యువకుల కోసం ఎంఎలక్ట్రానిక్ మ్యాన్యుఫ్యాక్చరింగ్ కంపెనీలో ఉద్యోగ అవకాశాలు కల్పించే ఉద్దేశంతో ఈ కార్యక్రమాన్ని ఏర్పాటు చేశారు.ఈ సందర్భంగా గ్రామంలోని పలువురు యువతీ యువకులు పెద్ద సంఖ్యలో హాజరై ఉద్యోగాల కోసం ఇంటర్వ్యూలలో పాల్గొన్నారు. ఈ కార్యక్రమంలో ఉప సర్పంచ్ జానా సత్యనారాయణ,పాలకవర్గ సభ్యులు బింగి సంజయ్,అంకర్ల శ్రీనివాస్,దొనకొండ శ్రీరాములు,తరుపునూరి అశ్విని బాలరాజ్ గౌడ్,బింగి లావణ్య రమేష్‌తో పాటు గ్రామ ప్రజలు,యువతీ యువకులు పాల్గొన్నారు. ఈ సందర్భంగా సర్పంచ్ బింగి అలివేలు మంగ శ్రీనివాస్ మాట్లాడుతూ, గ్రామంలో చదువుకున్న యువతీ యువకులు ఎవరూ నిరుద్యోగులుగా ఉండకుండా ప్రతి ఒక్కరూ ఉపాధి పొందుతూ తమ కుటుంబాలకు అండగా నిలవాలని ఆకాంక్షించారు. ఉద్యోగం ద్వారా ఆర్థికంగా స్థిరపడుతూ తమ భవిష్యత్ లక్ష్యాలను సాధించేందుకు యువత సంకల్పంతో ముందుకు సాగాలని సూచించారు. ముఖ్యంగా మహిళలు ఉద్యోగాలు చేస్తూ ఆర్థికంగా స్వావలంబన సాధించినప్పుడే కుటుంబాన్ని సమర్థవంతంగా నడిపించడంతో పాటు సమాజంలో గౌరవప్రదమైన స్థానం పొందగలరని పేర్కొన్నారు. తాను మహిళా సర్పంచ్‌గా మహిళా సాధికారతకు ప్రాధాన్యత ఇస్తూ గ్రామంలోని మహిళలకు ఉపాధి అవకాశాలు కల్పించేందుకు నిరంతరం కృషి చేస్తానని తెలిపారు.గ్రామీణ ప్రాంత యువతకు ఉపాధి అవకాశాలను చేరువ చేస్తూ నిర్వహించిన ఈ జాబ్ మేళా గ్రామ ప్రజల నుంచి ప్రశంసలు అందుకుంది.