భువనగిరి: జిల్లా ముఖ్య ప్రణాళిక అధికారి వెంకటరమణ పదవీ విరమణ సందర్భంగా కలెక్టరేట్ సమావేశ మందిరంలో ఘనంగా వీడ్కోలు కార్యక్రమం నిర్వహించారు.

ఈ కార్యక్రమానికి జిల్లా కలెక్టర్ అనురాగ్ జయంతి ముఖ్య అతిథిగా హాజరై మాట్లాడుతూ వెంకటరమణ సేవలను అభినందించారు. ప్రణాళికల రూపకల్పనలో ఆయన చూపిన నిబద్ధత ప్రశంసనీయమని పేర్కొన్నారు. జనగణన–2027కు సంబంధించి అధికారులకు, సిబ్బందికి శిక్షణ కార్యక్రమాలు విజయవంతంగా అమలు చేయడంలో ఆయన పాత్ర విశేషమన్నారు.

స్థానిక సంస్థల అదనపు కలెక్టర్ భాస్కర్‌రావు మాట్లాడుతూ జిల్లాలో మరువలేని సేవలు అందించారని కొనియాడారు. జనగణన కార్యక్రమంలో నిబద్ధతతో పనిచేసిన విధానాన్ని అభినందించారు.

టి.జి.ఓ రాష్ట్ర అసోసియేట్ ప్రెసిడెంట్, జేఏసీ చైర్మన్ మందడి ఉపేందర్‌రెడ్డి మాట్లాడుతూ సహచరులతో సమన్వయం పాటిస్తూ సేవలందించారని పేర్కొన్నారు.

పదవీ విరమణ పొందిన వెంకటరమణ తన అనుభవాలను పంచుకుంటూ సహచరుల సహకారానికి కృతజ్ఞతలు తెలిపారు.

అనంతరం జిల్లా కలెక్టర్, అదనపు కలెక్టర్, ఇతర అధికారులు కలిసి మెమెంటో, శాలువాతో ఆయనను ఘనంగా సన్మానించారు.

ఈ కార్యక్రమంలో జడ్పీ సీఈవో శోభారాణి, డీఆర్వో జయమ్మ, జిల్లా గ్రామీణాభివృద్ధి అధికారి నాగిరెడ్డి, ఇతర అధికారులు, సిబ్బంది పాల్గొన్నారు.