భువనగిరి: అంతర్జాతీయ మహిళా దినోత్సవం సందర్భంగా యాదాద్రి భువనగిరి జిల్లా కలెక్టర్ కార్యాలయంలో మహిళా ఉద్యోగులతో మూడు రోజుల పాటు ఆటల పోటీలు, సాంస్కృతిక కార్యక్రమాలు ఘనంగా నిర్వహించారు. ఈ నెల 5, 6, 7 తేదీల్లో నిర్వహించిన ఈ కార్యక్రమాల్లో మహిళా ఉద్యోగులు ఉత్సాహంగా పాల్గొన్నారు.

పోటీల్లో గెలుపొందిన విజేతలకు బహుమతులు అందజేశారు. ఈ కార్యక్రమానికి జిల్లా రెవెన్యూ అధికారి జయమ్మ ముఖ్య అతిథిగా హాజరై మాట్లాడుతూ మహిళలు అన్ని రంగాల్లో సమాన హక్కులతో ముందుకు రావాలని పిలుపునిచ్చారు.

ఈ సందర్భంగా ఉద్యోగ జేఏసీ చైర్మన్ మందడి ఉపేందర్ రెడ్డి మాట్లాడుతూ సమాజ నిర్మాణంలో మహిళల పాత్ర కీలకమని తెలిపారు. రాష్ట్రంలో సుమారు 45 శాతం మహిళలు ఉద్యోగులుగా సేవలందిస్తున్నారని పేర్కొన్నారు. మహిళలు అభద్రత భావాన్ని విడిచిపెట్టి అన్ని రంగాల్లో రాణించాలని సూచించారు.

ఈ కార్యక్రమంలో టీజీవో యాదాద్రి భువనగిరి జిల్లా ఉపాధ్యక్షురాలు అంబిక, కార్యదర్శి చైతన్య, టీఎన్జీవో కార్యదర్శి ఖదీర్, ఖజాంచి శ్రీకాంత్, ట్రెసా అధ్యక్షుడు కృష్ణ, జిల్లా విద్యాశాఖ అధికారి సత్యనారాయణతో పాటు పలువురు మహిళా ఉద్యోగులు పాల్గొన్నారు.