భువనగిరి గ్రామీణ యువతకు స్వయం ఉపాధి అవకాశాలు కల్పించే లక్ష్యంతో ఏర్పాటు చేసిన రూరల్ సెల్ఫ్ ఎంప్లాయ్మెంట్ ట్రైనింగ్ ఇన్‌స్టిట్యూట్ (ఆర్‌సెటి) శిక్షణా కేంద్రాన్ని సోమవారం భువనగిరి పట్టణంలోని కిసాన్ నగర్‌లో జిల్లా కలెక్టర్ అనురాగ్ జయంతి ప్రారంభించారు.

ఈ సందర్భంగా ఆయన మాట్లాడుతూ గ్రామీణ యువత, మహిళలు శిక్షణా అవకాశాలను సద్వినియోగం చేసుకుని ఆర్థికంగా అభివృద్ధి చెందాలని సూచించారు. ఆర్‌సెటి ద్వారా అందిస్తున్న నైపుణ్య శిక్షణలతో ఉపాధి అవకాశాలు మెరుగుపడతాయని, శిక్షణ అనంతరం స్వయం ఉపాధి ప్రారంభించేందుకు బ్యాంకుల నుంచి సహకారం అందుతుందని తెలిపారు.

జిల్లా గ్రామీణాభివృద్ధి అధికారి టి. నాగిరెడ్డి మాట్లాడుతూ సెల్‌ఫోన్ సర్వీసింగ్, ఫోటోగ్రఫీ, వీడియోగ్రఫీ, ఎలక్ట్రికల్ హోమ్ వైరింగ్, ప్లంబింగ్, టైలరింగ్, డ్రెస్ డిజైనింగ్, బ్యూటీ పార్లర్ మేనేజ్‌మెంట్, కంప్యూటరైజ్డ్ అకౌంటింగ్ వంటి కోర్సులు నిర్వహిస్తున్నట్లు తెలిపారు.

ఈ కార్యక్రమంలో ఆర్‌సెటి డైరెక్టర్ కిషన్ భుక్య, డివిజనల్ మేనేజర్ పంకజ్, ఎల్‌డీఎం మాటూరి వంశీ, డీపీఎం శ్రీనివాస్, జేడీఎం రాజు, బ్యాంకు ప్రతినిధులు, శిక్షణార్థులు పాల్గొన్నారు..