​నల్లగొండ : నల్లగొండ పట్టణ పరిధిలోని గొల్లగూడ ప్రాథమిక వ్యవసాయ సహకార సంఘం (పీఏసీఎస్) చైర్మన్‌గా ఆలకుంట్ల నాగరత్నం రాజు సోమవారం బాధ్యతలు స్వీకరించారు. ప్రభుత్వ ఉత్తర్వుల మేరకు ఆయన ఈ పదవిని చేపట్టారు. ఈ సందర్భంగా సంఘం కార్యాలయంలో అధికారులు, సిబ్బంది మరియు అభిమానులు ఆయనకు ఘనంగా స్వాగతం పలికి, పూలమాలలు, శాలువాలతో ఘనంగా సన్మానించారు.

అనంతరం నాగరత్నం రాజు మాట్లాడుతూ రైతులకు సేవ చేసే అవకాశం దక్కడం తన అదృష్టంగా భావిస్తున్నట్లు తెలిపారు. గొల్లగూడ పీఏసీఎస్ పరిధిలోని రైతులకు ఎలాంటి ఇబ్బందులు కలగకుండా ధాన్యం కొనుగోలు ప్రక్రియను వేగవంతం చేస్తామని, అలాగే సాగు పనులకు అవసరమైన రుణాలు సకాలంలో అందేలా చర్యలు తీసుకుంటామని హామీ ఇచ్చారు. రాష్ట్ర రోడ్లు, భవనాలు మరియు సినిమాటోగ్రఫీ శాఖ మంత్రి కోమటిరెడ్డి వెంకటరెడ్డి సహకారంతో సొసైటీని అన్ని రంగాల్లో అభివృద్ధి చేసి, రాష్ట్రంలోనే అగ్రగామిగా నిలిపేందుకు శ్రమిస్తానని ఆయన పేర్కొన్నారు. రైతుల సంక్షేమమే ధ్యేయంగా పాలకవర్గం మరియు సిబ్బందితో కలిసి పనిచేస్తామని ఈ సందర్భంగా స్పష్టం చేశారు.