బొమ్మలరామారం, స్థానికంగా లభించే ఆహార పదార్థాలు, చిరుధాన్యాలతో తయారు చేసిన పోషకాహారంపై అవగాహన పెంపొందించేందుకు బొమ్మలరామారం మండలంలోని చౌదర్పల్లి, మర్యాల అంగన్వాడీ కేంద్రాల్లో పోషణ పక్వాడ కార్యక్రమాన్ని ఘనంగా నిర్వహించారు.

ఈ సందర్భంగా సీడీపీఓ శైలజ గర్భిణులు, బాలింత తల్లులకు చిరుధాన్యాల వినియోగం, వాటి పోషక విలువలపై వివరించారు. మహిళల ఆరోగ్యానికి చిరుధాన్యాలు ఎంత ముఖ్యమో చెప్పి, సమతుల ఆహారం తీసుకోవడం వల్ల కలిగే ప్రయోజనాలను తెలియజేశారు.

కార్యక్రమంలో భాగంగా అక్షరాభ్యాసం, అన్నప్రసన్న కార్యక్రమాలు నిర్వహించారు. పలు గ్రామాల ప్రజాప్రతినిధులు పాల్గొని కార్యక్రమాన్ని విజయవంతం చేశారు.

ఈ కార్యక్రమంలో సూపర్వైజర్ అన్వర్నిసా బేగం, సర్పంచ్ కూర వెంకటేష్, సంగి గణేష్, ఉపసర్పంచ్ చెన్నమలు, వార్డు సభ్యులు, అంగన్వాడీ టీచర్లు వరమ్మ, రాజమణి, ఆశా వర్కర్లు, గర్భిణులు పాల్గొన్నారు.