రామన్నపేట, జూలై 13 నులిపురుగుల బారినుంచి కాపాడి ఆరోగ్యవంతమైన భవిష్యత్తును అందించాలనే లక్ష్యంతో రామన్నపేట మండల కేంద్రంలోని నాగార్జున స్కూల్‌లో జాతీయ నులిపురుగుల నివారణ దినోత్సవాన్ని పురస్కరించుకుని విద్యార్థులకు ఆల్బెండజోల్ మాత్రలు పంపిణీ చేశారు.

ఈ సందర్భంగా పాఠశాల ప్రిన్సిపాల్ రేఖ నకిరేకంటి మాట్లాడుతూ.. చిన్నారుల్లో నులిపురుగులు కడుపులో చేరడం వల్ల రక్తహీనత, పోషకాహార లోపం, నీరసం, ఆకలి తగ్గడం, కడుపునొప్పి, వికారం, వాంతులు వంటి ఆరోగ్య సమస్యలు తలెత్తుతాయని తెలిపారు. ఏడాదికి ఒకసారి ఆల్బెండజోల్ మాత్ర తీసుకోవడం ద్వారా నులిపురుగుల సమస్యను సమర్థవంతంగా నివారించవచ్చన్నారు.

పిల్లలు భోజనం చేసే ముందు చేతులు శుభ్రంగా కడుక్కోవడం, పరిశుభ్రమైన తాగునీటినే వినియోగించడం, పూర్తిగా ఉడికిన ఆహారాన్ని మాత్రమే తీసుకోవడం వంటి అలవాట్లు పెంపొందించుకోవాలని సూచించారు. చిన్నారుల ఆరోగ్య పరిరక్షణలో తల్లిదండ్రులు, ఉపాధ్యాయులు కూడా కీలక పాత్ర పోషించాలని పేర్కొన్నారు.

ఈ కార్యక్రమంలో ఆశా కార్యకర్త శోభ, పాఠశాల సిబ్బంది సాయి ప్రసన్న, నాసియా తదితరులు పాల్గొన్నారు