తెలంగాణ ప్రభుత్వం ప్రతిష్ఠాత్మకంగా చేపట్టిన రెవెన్యూ గ్రామాల రి-సర్వే పైలట్ ప్రాజెక్ట్‌లో భాగంగా నారాయణఖేడ్ తాలూకాలోని వివిధ మండలాల్లో చేపట్టనున్న రి-సర్వే పనులపై గౌరవ సబ్ కలెక్టర్ ఎన్. ఉమా హారతి సమీక్షా సమావేశం నిర్వహించారు. ఈ సమావేశంలో మండల సర్వేయర్లు, ఐకేపీ సర్వేయర్లు, లైసెన్స్ సర్వేయర్లతో రి-సర్వే నిర్వహణ విధానం, భూ సరిహద్దుల ఖచ్చితమైన గుర్తింపు, రికార్డుల పరిశీలన, ప్రజలకు ఎలాంటి ఇబ్బందులు కలగకుండా పారదర్శకంగా సర్వే చేపట్టే అంశాలపై సవివరంగా చర్చించారు. రి-సర్వే ప్రక్రియను నిర్ణీత గడువులో నాణ్యతతో పూర్తి చేసి ప్రభుత్వ లక్ష్యాలకు అనుగుణంగా పనిచేయాలని, ప్రతి అధికారి సమన్వయంతో బాధ్యతాయుతంగా విధులు నిర్వర్తించాలని సబ్ కలెక్టర్ సూచించారు. ఈ కార్యక్రమంలో శిక్షణ డిప్యూటీ కలెక్టర్లు దీపిక, ప్రతిభతో పాటు సంబంధిత అధికారులు, సర్వేయర్లు పాల్గొన్నారు.