అంగన్వాడి కేంద్రంలో అన్నప్రాసన వేడుక

నేలకొండపల్లి మండలం రాయిగూడెం గ్రామ అంగన్వాడి కేంద్రంలో ఐసీడీఎస్ ఆధ్వర్యంలో బుధవారం అన్నప్రాసన వేడుక నిర్వహించారు. గ్రామానికి చెందిన బోయిన గోపి–మాధవి దంపతుల కుమార్తె పవన్ శ్రీ అన్నప్రాసన కార్యక్రమానికి గ్రామ సర్పంచ్ బోయిన వేణు హాజరై చిన్నారిని ఆశీర్వదించారు. కుటుంబ సభ్యులకు శుభాకాంక్షలు తెలిపారు.

ఈ సందర్భంగా అంగన్వాడి కేంద్రంలో విద్యార్థులకు అందిస్తున్న మధ్యాహ్న భోజనాన్ని పరిశీలించిన సర్పంచ్, ఆహార నాణ్యతపై సిబ్బందితో మాట్లాడారు. పిల్లలకు అందించే ఆహారంలో ఎలాంటి లోటుబాట్లు లేకుండా పోషకాహారం అందించాలని సూచించారు. చిన్నారుల ఆరోగ్య సంరక్షణలో అంగన్వాడి సిబ్బంది కీలక పాత్ర పోషించాలని అన్నారు.

కార్యక్రమంలో ఉప సర్పంచ్ సూరేపల్లి ప్రేమ్ కుమార్, అంగన్వాడి టీచర్లు సూరేపల్లి సుజాత, ఎన్నబోయిన విజయ, శ్రీలత సామ్రాజ్యం తదితరులు పాల్గొన్నారు. గ్రామస్తులు కూడా హాజరై వేడుకను విజయవంతం చేశారు.