కఠిన చర్యలకు ఆదేశించిన ఎస్పీ శరత్ చంద్ర పవార్.

నల్లగొండ పట్టణంలో బాలిక పట్ల అసభ్యంగా ప్రవర్తించిన ఘటనలో పోలీసు శాఖకు చెందిన ఓ కానిస్టేబుల్‌పై పోక్సో కేసు నమోదవడం సంచలనంగా మారింది. గుర్రంపోడు పోలీస్‌స్టేషన్‌లో విధులు నిర్వహిస్తున్న కానిస్టేబుల్ సత్యనారాయణపై నల్లగొండ వన్‌టౌన్ పోలీస్‌స్టేషన్‌లో పోక్సో చట్టం కింద కేసు నమోదు చేసినట్లు పోలీసులు తెలిపారు.బాధిత బాలిక కుటుంబ సభ్యుల ఫిర్యాదు మేరకు కేసు నమోదు చేసి దర్యాప్తు చేపట్టిన వన్‌టౌన్ పోలీసులు, నిందితుడిని అదుపులోకి తీసుకుని విచారణ అనంతరం కోర్టులో హాజరుపరిచారు. కోర్టు ఆదేశాల మేరకు అతడిని రిమాండ్‌కు తరలించి జైలుకు పంపించారు.ఈ ఘటనను అత్యంత తీవ్రంగా పరిగణించిన జిల్లా ఎస్పీ శరత్ చంద్ర పవార్, ఐపీఎస్, నిందిత కానిస్టేబుల్ సత్యనారాయణను వెంటనే సస్పెండ్ చేస్తూ ఉత్తర్వులు జారీ చేశారు. బాలల రక్షణకు సంబంధించిన కేసుల్లో ఎలాంటి రాజీ ఉండదని, చట్టాన్ని అతిక్రమించిన వారిపై కఠిన చర్యలు తప్పవని పోలీసు అధికారులు స్పష్టం చేశారు.ఈ ఘటన జిల్లాలో చర్చనీయాంశంగా మారగా, పోలీసు శాఖలోనూ కలకలం రేపింది. కేసుకు సంబంధించిన పూర్తి వివరాలపై పోలీసులు దర్యాప్తు కొనసాగిస్తున్నారు.