యూ-టర్న్ తీసుకుంటుండగా మృత్యువు కబలింత..

​మాడుగులపల్లి : నల్గొండ జిల్లా మాడుగులపల్లి మండల పరిధిలో ఘోర రోడ్డు ప్రమాదం చోటుచేసుకుంది. అతివేగంగా వచ్చిన కారు ఒక వాహనదారుడిని బలితీసుకుంది. ఈ ఘటనతో నామ్ ఎక్స్‌ప్రెస్ వేపై భారీగా వాహనాలు నిలిచిపోయి ప్రయాణికులు తీవ్ర ఇబ్బందులు పడ్డారు. స్థానికులు మరియు పోలీసులు తెలిపిన వివరాల ప్రకారం మాడుగులపల్లి టోల్‌గేట్ సమీపంలోని అంతయ్యగూడెం యూ-టర్న్ వద్ద శనివారం ఒక వాహనదారుడు తన వాహనాన్ని రోడ్డు దాటించేందుకు (యూ-టర్న్) ప్రయత్నిస్తున్నాడు.

అదే సమయంలో నామ్ ఎక్స్‌ప్రెస్ వేపై అతివేగంతో దూసుకొచ్చిన ఒక కారు సదరు వాహనాన్ని బలంగా ఢీకొట్టింది. ఈ ప్రమాద తీవ్రతకు వాహనదారుడు అక్కడికక్కడే ప్రాణాలు కోల్పోయాడు. ప్రమాద సమాచారం అందుకున్న వెంటనే స్థానికులు ఘటనా స్థలానికి చేరుకున్నారు. మృతి చెందిన వ్యక్తిని సిరిగిరి రాంరెడ్డిగా గుర్తించారు. మృతదేహం రోడ్డుపై పడి ఉండటం, వాహనం నుజ్జునుజ్జు కావడంతో ఆ ప్రాంతంలో విషాద ఛాయలు అలముకున్నాయి. ఎక్స్‌ప్రెస్ వేపై ప్రధాన కూడలి వద్ద ప్రమాదం జరగడంతో రాకపోకలకు తీవ్ర అంతరాయం ఏర్పడింది. కిలోమీటర్ల మేర వాహనాలు నిలిచిపోవడంతో పోలీసులు రంగ ప్రవేశం చేశారు. మాడుగులపల్లి పోలీసులు ఘటనా స్థలాన్ని పరిశీలించి మృతదేహాన్ని పోస్టుమార్టం నిమిత్తం ఆసుపత్రికి తరలించేందుకు చర్యలు చేపట్టారు. క్రేన్ సహాయంతో ప్రమాదానికి గురైన వాహనాలను పక్కకు తొలగించి ట్రాఫిక్‌ను క్రమబద్ధీకరించారు. అతివేగమే ప్రమాదానికి కారణమని ప్రాథమికంగా భావిస్తున్నాం. కేసు నమోదు చేసుకుని దర్యాప్తు జరుపుతున్నామని పోలీసులు వెల్లడించారు.