రామన్నపేట

రాష్ట్ర చేనేత సహకార సంఘాల ఎన్నికల నోటిఫికేషన్ నేపథ్యంలో స్థానిక కాటన్ చేనేత సహకార సంఘం ఎన్నికల షెడ్యూల్‌ను ఎన్నికల అధికారి కె. సురేష్ సోమవారం విడుదల చేశారు. ఈ సందర్భంగా సంఘం అధ్యక్షుడు జెల్ల వెంకటేష్‌కు ధ్రువీకరించిన ఓటరు జాబితాను అందజేశారు.

జూలై 2 నుంచి 4 వరకు నామినేషన్ల స్వీకరణ, 5న పరిశీలన, 6న నామినేషన్ల ఉపసంహరణ, తుది జాబితా విడుదలతో పాటు ఎన్నికల గుర్తుల కేటాయింపు చేపట్టనున్నట్లు తెలిపారు. జూలై 10న పోలింగ్ నిర్వహించి, అదే రోజు మధ్యాహ్నం 2 గంటల నుంచి ఓట్ల లెక్కింపు చేపడతామన్నారు. తుది ఫలితాల ప్రకటన అనంతరం మూడు రోజుల్లో కార్యవర్గాన్ని ఏర్పాటు చేయనున్నట్లు వెల్లడించారు.

సంఘంలో మొత్తం 9 డైరెక్టర్ స్థానాలు ఉండగా, వాటిలో 7 జనరల్, 2 మహిళలకు కేటాయించినట్లు తెలిపారు. నామినేషన్ ఫీజు రూ.750గా నిర్ణయించామని, అభ్యర్థులు ప్రతిపాదకులతో కలిసి స్వయంగా నామినేషన్ పత్రాలు సమర్పించాలని సూచించారు. ఎన్నికల షెడ్యూల్‌ను తహసీల్దార్, ఎంపీడీవో, పోలీస్ స్టేషన్, గ్రామపంచాయతీ కార్యాలయాల్లో ప్రదర్శనకు ఉంచామని, ఓటర్లు జాబితాను పరిశీలించుకోవచ్చని చెప్పారు.

ఈ కార్యక్రమంలో సంఘం ఉపాధ్యక్షుడు పెండెం వేణు, కార్యదర్శి దొంత నాగరాజు, వనం నరసింహ, పెండెం బాహన్ ఋషి, గంజి అశోక్, కైరం కొండ నాగభూషణ్ తదితరులు పాల్గొన్నారు.