.రామన్నపేట,

రామన్నపేట మండలం సిరిపురం గ్రామంలో నూతనంగా ఏర్పాటు చేసిన 'సిరి కన్స్ట్రక్షన్స్' సంస్థను ప్రభుత్వ విప్, నకిరేకల్ ఎమ్మెల్యే వేముల వీరేశం, భువనగిరి ఎమ్మెల్యే కుంభం అనిల్ కుమార్ రెడ్డి ఆదివారం సంయుక్తంగా ప్రారంభించారు.

ఈ సందర్భంగా ఎమ్మెల్యే వేముల వీరేశం మాట్లాడుతూ, గ్రామీణ ప్రాంతాల్లో ఇలాంటి నూతన వ్యాపార సంస్థలు ఏర్పాటు కావడం శుభపరిణామమన్నారు. నిర్మాణ రంగంలో ఉన్న అవకాశాలను యువత సద్వినియోగం చేసుకొని స్వయం ఉపాధి దిశగా అడుగులు వేయాలని సూచించారు.

భువనగిరి ఎమ్మెల్యే కుంభం అనిల్ కుమార్ రెడ్డి మాట్లాడుతూ, రాష్ట్ర ప్రభుత్వం స్కిల్ డెవలప్‌మెంట్, స్వయం ఉపాధి పథకాల ద్వారా యువతకు అండగా నిలుస్తోందన్నారు. సిరి కన్స్ట్రక్షన్స్ వంటి సంస్థలు స్థానిక యువతకు ఉపాధి కల్పించడంతో పాటు గ్రామ అభివృద్ధికి దోహదపడతాయని చెప్పారు. ఉద్యోగాల కోసం ఎదురు చూడకుండా పారిశ్రామికవేత్తలుగా ఎదగాలని యువతకు పిలుపునిచ్చారు.

సంస్థ యాజమాన్యాన్ని ఎమ్మెల్యేలు అభినందిస్తూ, నాణ్యమైన నిర్మాణ సామగ్రి, సేవలను ప్రజలకు అందించి సంస్థ మరింత అభివృద్ధి చెందాలని ఆకాంక్షించారు.

ఈ కార్యక్రమంలో స్థానిక ప్రజాప్రతినిధులు, కాంగ్రెస్ పార్టీ మండల నాయకులు, సిరిపురం గ్రామస్తులు, యువకులు తదితరులు పాల్గొన్నారు.