శ్రీ సత్యసాయి జిల్లా పెనుకొండలో ప్రభుత్వ ఆధ్వర్యంలో అన్న క్యాంటీన్ ప్రారంభిస్తూ రాష్ట్ర బీసీ సంక్షేమ శాఖ మంత్రి సవిత, పేదల ఆకలి తీర్చడమే ప్రభుత్వ లక్ష్యమని తెలిపారు. సీఎం N. చంద్రబాబు నాయుడు ప్రారంభించిన అన్న క్యాంటీన్లు అమ్మలా పేదలకు మూడు పూటలా భోజనం అందిస్తున్నాయని చెప్పారు. రాష్ట్ర వ్యాప్తంగా ఏర్పాటు చేసిన క్యాంటీన్ల ద్వారా రోజుకు సుమారు 2.72 లక్షల మంది పేదలు, కార్మికులు భోజనం చేస్తున్నారని వివరించారు.

ఎన్నికల హామీ మేరకు అన్న క్యాంటీన్లను తిరిగి ప్రారంభించామని, ప్రస్తుతం రాష్ట్రంలో 269 క్యాంటీన్లు పనిచేస్తున్నాయని మంత్రి తెలిపారు. పెనుకొండలో తాను వెయ్యి రోజుల పాటు సొంత నిధులతో అన్న క్యాంటీన్ నిర్వహించానని, ఎన్నో అడ్డంకులు వచ్చినా వెనుకడుగు వేయలేదని చెప్పారు. అప్పట్లో హేళన చేసినవారి నోళ్లు ఇప్పుడు మూయించామని పేర్కొన్నారు.

మాజీ సీఎం Y. S. జగన్ మోహన్ రెడ్డి పాలనలో అన్న క్యాంటీన్లు మూసివేయడం వల్ల పేదలు ఇబ్బందులు ఎదుర్కొన్నారని విమర్శించారు. కూటమి ప్రభుత్వం అధికారంలోకి రాగానే వాటిని పునరుద్ధరించామని తెలిపారు.

త్వరలో గోరంట్లలో కూడా సొంత నిధులతో అన్న క్యాంటీన్ ప్రారంభించనున్నట్లు మంత్రి వెల్లడించారు. సీఎం జన్మదిన సందర్భంగా నారా భువనేశ్వరి రూ.76 లక్షలు విరాళంగా ఇచ్చి ఒక రోజు ఉచిత భోజనం అందించిన విషయాన్ని గుర్తుచేశారు.

ఈ కార్యక్రమంలో ఎంపీ బీకే పార్థసారథి, ఎమ్మెల్యే ఎమ్మెస్ రాజు, అధికారులు, ప్రజాప్రతినిధులు, కార్యకర్తలు పెద్ద సంఖ్యలో పాల్గొన్నారు.