పీహెచ్సీ వెనుక తెల్లవారుజామున వినిపించిన పసికందు ఏడుపు.. స్థానిక మహిళ చొరవతో శిశువు రక్షణ, బాధ్యుల కోసం పోలీసుల దర్యాప్తు

న్యాల్కల్,

పుట్టి కొన్ని గంటలే అయిన ఓ నవజాత శిశువు తల్లి ఒడిలో కాకుండా ఆసుపత్రి వెనుక ముళ్లపొదల్లో కనిపించడం స్థానికులను కలచివేసింది. తెలంగాణ రాష్ట్ర ఆవిర్భావ దినోత్సవ వేడుకల సందడి మధ్య సంగారెడ్డి జిల్లా న్యాల్కల్‌లో చోటుచేసుకున్న ఈ ఘటన ప్రతి ఒక్కరినీ భావోద్వేగానికి గురిచేసింది.తెల్లవారుజామున సుమారు 5 గంటల సమయంలో న్యాల్కల్ ప్రాథమిక ఆరోగ్య కేంద్రం (పీహెచ్‌సీ) వెనుక భాగంలో గల ముళ్లపొదల్లో నుంచి పసికందు ఏడుపు వినిపించింది. కాలకృత్యాల కోసం వెళ్లిన మాణిక్ నగర్ కాలనీ కి చెందిన టేకు లక్ష్మి అక్కడికి వెళ్లి చూడగా అప్పుడే జన్మించిన మగ శిశువు కనిపించాడు.చలికి వణుకుతున్న ఆ పసిబాలుడిని ఆమె అక్కున చేర్చుకుని ఇంటికి తీసుకెళ్లి శుభ్రపరిచింది. అనంతరం ఈ విషయాన్ని కాలనీ వాసులు పోలీసులకు, వైద్య సిబ్బందికి సమాచారం అందించారు.సమాచారం అందుకున్న వైద్యాధికారి డాక్టర్ అమృతరాజ్‌తో పాటు సిబ్బంది సంఘటనా స్థలానికి చేరుకుని శిశువును పరిశీలించారు. ప్రాథమిక వైద్య పరీక్షలు నిర్వహించిన అనంతరం మెరుగైన చికిత్స, సంరక్షణ కోసం శిశువును ప్రభుత్వ ఆసుపత్రికి తరలించారు.ఏఎన్‌ఎం సరళ, ఆశా వర్కర్ వినోద్, టేకు లక్ష్మి తదితరుల సమక్షంలో 108 అంబులెన్స్ ద్వారా శిశువును సంగారెడ్డి జిల్లా కేంద్ర ఆసుపత్రికి తరలించారు. ప్రస్తుతం బాలుడి ఆరోగ్య పరిస్థితి నిలకడగా ఉన్నట్లు వైద్యులు తెలిపారు.ఇదిలా ఉండగా, శిశువును అక్కడ వదిలివెళ్లిన వారు ఎవరు? ఎలాంటి పరిస్థితుల్లో ఈ నిర్ణయం తీసుకున్నారు? అనే కోణాల్లో పోలీసులు దర్యాప్తు చేపట్టారు. పరిసర ప్రాంతాల్లోని సీసీటీవీ దృశ్యాలను పరిశీలిస్తూ బాధ్యుల ఆచూకీ కోసం గాలిస్తున్నారు. తల్లి ఒడిలో ఉండాల్సిన పసిప్రాణం ముళ్లపొదల్లో కనిపించడంతో గ్రామస్థులు ఆవేదన వ్యక్తం చేస్తున్నారు.