భువనగిరి, గర్భిణీలు, చిన్నారులకు అందించే టీకా సేవలను డిజిటల్ విధానంలో నమోదు చేసేందుకు కేంద్ర ప్రభుత్వం ప్రవేశపెట్టిన UWIN పోర్టల్ వినియోగంపై జిల్లాలోని ప్రైవేట్ ఆసుపత్రులకు అవగాహన కల్పించారు. బుధవారం కలెక్టర్ కార్యాలయంలో నిర్వహించిన శిక్షణ కార్యక్రమంలో 52 డెలివరీ పాయింట్లుగా నమోదైన ప్రైవేట్ ఆసుపత్రుల ప్రతినిధులు పాల్గొన్నారు.

జిల్లాలో ఇప్పటికే 40 ప్రైవేట్ ఆసుపత్రులు UWIN ఐడీలు పొంది గర్భిణీలు, నవజాత శిశువుల వివరాలను నమోదు చేస్తున్నట్లు అధికారులు తెలిపారు. మిగిలిన ఆసుపత్రులు కూడా వెంటనే పోర్టల్‌లో నమోదు ప్రక్రియ చేపట్టాలని సూచించారు.

UWIN ద్వారా గర్భిణీల నమోదు, ప్రసవ వివరాలు, నవజాత శిశువుల నమోదు, జనన నివేదికలు, టీకాల నమోదు, తదుపరి టీకాల ట్రాకింగ్ వంటి సేవలు అందుబాటులో ఉంటాయని వివరించారు. టీకా సేవలకు సంబంధించిన సమాచారం, తదుపరి టీకాల తేదీలు ఎస్‌ఎంఎస్ ద్వారా అందడంతో పాటు వ్యాక్సినేషన్ సర్టిఫికెట్లు, రికార్డులు డిజిటల్ రూపంలో పొందే అవకాశం ఉంటుందని పేర్కొన్నారు.

శిక్షణ కార్యక్రమంలో వైద్య ఆరోగ్య శాఖ అధికారులు, UWIN పోర్టల్ పరిశీలకులు, ప్రైవేట్ ఆసుపత్రుల యాజమాన్య ప్రతినిధులు, డేటా ఎంట్రీ ఆపరేటర్లు, వైద్య సిబ్బంది పాల్గొన్నారు.