నారాయణఖేడ్ నియోజకవర్గంలోని కల్హేర్ మండల పరిధిలోని మహాదేవ్‌పల్లి గ్రామంలో గ్రామ సమాఖ్య సమావేశం నిర్వహించారు. ఈ కార్యక్రమానికి కల్హేర్ మండల సమాఖ్య ఏపీఎం వంశీకృష్ణ ముఖ్య అతిథిగా హాజరై గ్రామ సమాఖ్యలు మహిళల ఆర్థికాభివృద్ధి, స్వయం ఉపాధి అవకాశాల పెంపు, ప్రభుత్వ సంక్షేమ పథకాల అమలులో కీలక పాత్ర పోషిస్తున్నాయని తెలిపారు. అనంతరం మహాదేవ్‌పల్లి గ్రామ సంఘానికి నూతన కార్యవర్గాన్ని ఏకగ్రీవంగా ఎన్నుకోగా, అధ్యక్షురాలిగా గులాపల్లి లక్ష్మీ, కార్యదర్శిగా గుల మోగులవ్వ, కోశాధికారిగా గులాపల్లి అనిత, ఉపాధ్యక్షురాలిగా బైండ్ల కృష్ణవేణి, ఉప కార్యదర్శిగా చిన్నం మంజుల బాధ్యతలు చేపట్టారు. నూతన కార్యవర్గ సభ్యులను అభినందించిన వంశీకృష్ణ గ్రామ సంఘం అభివృద్ధితో పాటు మహిళల సంక్షేమం, స్వయం సహాయక సంఘాల బలోపేతానికి కృషి చేయాలని సూచించారు. ఈ కార్యక్రమంలో సీసీ బేబీ, గ్రామ స్థాయి బాధ్యుడు బాలయ్య, గ్రామ సంఘం ఈసీ సభ్యులు, మహిళా సంఘాల సభ్యులు మరియు గ్రామస్తులు పాల్గొన్నారు. నూతన కార్యవర్గం ఎన్నిక కావడంతో గ్రామ సంఘ సభ్యులు హర్షం వ్యక్తం చేస్తూ ఎన్నికైన సభ్యులకు శుభాకాంక్షలు తెలిపారు.