ప్రాజెక్టులు తెచ్చింది కోమటిరెడ్డి సోదరులే పదేళ్ల పాలనలో బీఆర్ఎస్ ఒక్క పైసా ఇవ్వలేదు..

మునుగోడులో 165 మందికి రూ.48.37 లక్షల సీఎంఆర్ఎఫ్ చెక్కుల పంపిణీ..

​మునుగోడు : మునుగోడు శాసనసభ్యులు కోమటిరెడ్డి రాజగోపాల్ రెడ్డిపై సోషల్ మీడియా వేదికగా అసత్య ఆరోపణలు చేస్తున్న వారిపై ఉమ్మడి నల్గొండ జిల్లా డీసీసీబీ మాజీ ఛైర్మన్ కుంభం శ్రీనివాసరెడ్డి తీవ్రస్థాయిలో ధ్వజమెత్తారు. రాజగోపాల్ రెడ్డిపై అవాకులు చవాకులు పేలితే సహించేది లేదని అటువంటి వారిని 'తొక్కి నారతీస్తాం' అని హెచ్చరించారు. శుక్రవారం మునుగోడులోని ఎమ్మెల్యే క్యాంపు కార్యాలయంలో ఏర్పాటు చేసిన కార్యక్రమంలో 165 మంది లబ్ధిదారులకు రూ.48,37,500 విలువైన ముఖ్యమంత్రి సహాయనిధి (సీఎంఆర్ఎఫ్) చెక్కులను ఆయన పంపిణీ చేశారు.

ఈ సందర్భంగా శ్రీనివాసరెడ్డి మాట్లాడుతూ.. నాడు దివంగత ముఖ్యమంత్రి వైఎస్ రాజశేఖర రెడ్డితో కొట్లాడి ఈ ప్రాంత రైతాంగానికి సాగునీరు అందించాలనే దీర్ఘ దృష్టితో బ్రాహ్మణ వెల్లంల ప్రాజెక్టును తీసుకొచ్చిన ఘనత కోమటిరెడ్డి సోదరులదేనని స్పష్టం చేశారు. పదేళ్లపాటు అధికారాన్ని వెలగబెట్టిన బీఆర్ఎస్ ప్రభుత్వం, ఈ ప్రాజెక్టుకు ఒక్క పైసా నిధులు కూడా కేటాయించకుండా తన నీచ బుద్ధిని చాటుకుందని మండిపడ్డారు. రాష్ట్రంలో ప్రజా ప్రభుత్వం కొలువుదీరిన తర్వాతే ప్రత్యేక నిధులు మంజూరు చేసి బ్రాహ్మణ వెల్లంల ప్రాజెక్టును పూర్తి చేశామని గర్వంగా చెప్తున్నామన్నారు. మునుగోడు మండలానికి నీటిని మళ్లించేందుకు ఎమ్మెల్యే రాజగోపాల్ రెడ్డి అహర్నిశలు శ్రమిస్తున్నారని గత వేసవిలో ప్రభుత్వం నుండి నిధులు రాకముందే తన సొంత ఖర్చుతో కాలువలు తవ్వించి పులిపలుపుల చెరువుకు నీటిని తెచ్చిన ఘనత ఆయనదేనని కొనియాడారు. గత ప్రభుత్వ హయాంలో కేవలం కమిషన్ల కోసమే రిజర్వాయర్ల కట్టలు కట్టి వదిలేశారని, ఆ రిజర్వాయర్లకు ఎదుల నుండి నీటిని మళ్లించేందుకు ఎమ్మెల్యే రాజగోపాల్ రెడ్డి ప్రత్యేక చొరవతో 1800 కోట్ల రూపాయల నిధులు మంజూరు చేయించారని శ్రీనివాసరెడ్డి గుర్తు చేశారు. రాజకీయాలతో సంబంధం లేకుండా తన మాతృమూర్తి కోమటిరెడ్డి సుశీలమ్మ ఫౌండేషన్ ద్వారా పేదల కోసం కోట్లాది రూపాయలు ఖర్చు చేస్తూ సామాజిక సేవలో ఆయన ముందున్నారని తెలిపారు. సీఎంఆర్ఎఫ్, కల్యాణ లక్ష్మి, షాదీ ముబారక్ వంటి ప్రభుత్వ పథకాలను కూడా ఎంతో పారదర్శకంగా, పార్టీలకతీతంగా అర్హులైన ప్రతి ఒక్కరికీ అందిస్తున్న గొప్ప మానవతావాది రాజగోపాల్ రెడ్డి అని కొనియాడారు. ఈ కార్యక్రమంలో మునుగోడు మండలంలోని నూతనంగా ఎన్నికైన సర్పంచులు, కాంగ్రెస్ పార్టీ మండల ముఖ్య నాయకులు, కార్యకర్తలు పాల్గొన్నారు.