మనం అనుభవించే రాజ్యాంగ ఫలాలు అంబేద్కర్ త్యాగాల తోనే.....

రేపాల గ్రామ సర్పంచ్ మొగిలిచర్ల సత్యనారాయణ

భారత రాజ్యాంగ నిర్మాత డాక్టర్ బాబా సాహెబ్ అంబేద్కర్ సంస్కరణలకు ఆద్యుడని రేపాల గ్రామ సర్పంచ్ మొగిలిచర్ల సత్యనారాయణ అన్నారు. డాక్టర్ బి.ఆర్ అంబేద్కర్ 135వ జయంతి వేడుకలు రేపాల గ్రామపంచాయతీ కార్యాలయంలో ఘనంగా నిర్వహించారు. అంబేద్కర్ చిత్రపటానికి సర్పంచ్ మొగిలిచర్ల సత్యనారాయణ పూలమాలలు వేసి ఘనంగా నివాళులర్పించారు.ఈ సందర్భంగా సర్పంచ్ సత్యనారాయణ మాట్లాడుతూ..సమాజంలోని అంటరానితన్నాన్ని నిర్మూలించేందుకు అంబేడ్కర్ చేసిన కృషి మరువలేనిదన్నారు. ఆయన రాజ్యాంగం ద్వారా సమాజంలోని అన్ని వర్గాల వారికి సమన్యాయం చేశారని కొనియాడారు. ఆయన స్ఫూర్తితో ప్రతిఒక్కరూ ముందుకెళ్లాలని సూచించారు.అంబేద్కర్ బడుగు, బలహీనవర్గాలు, దళితుల సంక్షేమం కోసం పోరాడిన యోధుడని పేర్కొన్నారు.అంబేద్కర్ రాజ్యాంగ నిర్మాతగా, బడుగు బలహీన వర్గాల అభ్యున్నతికి కృషి చేసిన మహానుభావుడని కొనియాడారు.సమానత్వం, సామాజిక న్యాయం వంటి విలువలను ప్రతి ఒక్కరూ పాటించాలని కోరారు. ఆయన చూపిన బాటలో నడిస్తేనే సమాజంలో మార్పు సాధ్యమవుతుందని పేర్కొన్నారు. అంటరానితనంపై పోరాడి మహిళలు, దళితుల హక్కుల కోసం కృషి చేసిన అంబేద్కర్, పేదల పాలిట ఆశాజ్యోతి అని కొనియాడారు. మతం కన్నా మానవత్వమే గొప్పదని చాటిన ఆయన సేవలు చిరస్మరణీయమన్నారు. ఈ కార్యక్రమంలో గ్రామ పంచాయతీ కార్యదర్శి, గ్రామ ఉపసర్పంచ్, ప్రాథమిక వైద్యశాల డాక్టర్, పశు వైద్యశాల డాక్టర్, పలువురు వార్డు మెంబర్లు, గ్రామ పెద్దలు, తదితరులు పాల్గొని అంబేద్కర్ చిత్రపటానికి పూలమాలలు వేసి నివాళులు అర్పించారు.