సంగారెడ్డి జిల్లా స్థానికం ప్రతినిధి కృష్ణ

సంగారెడ్డి జిల్లా హద్నూర్ మండలానికి చెందిన ఒక యువతి, పాలిటెక్నిక్ విద్య పూర్తి చేసి, ప్రేమ విఫలమైందనే కారణంతో తీవ్ర మానసిక ఒత్తిడికి లోనై ఆత్మహత్య చేసుకునే ప్రయత్నం చేస్తున్నట్లు సామాజిక మాధ్యమాల్లో పోస్ట్ చేయడం జరిగింది.ఈ విషయాన్ని గమనించిన జిల్లా స్థాయి సామాజిక మాధ్యమాల పర్యవేక్షణ సిబ్బంది, వెంటనే హద్నూర్ పోలీస్ స్టేషన్ ఎస్‌ఐ సుజిత్‌కు సమాచారం అందించారు. సమాచారం అందుకున్న వెంటనే ఎస్‌ఐ సుజిత్ ఎలాంటి ఆలస్యం చేయకుండా తన సిబ్బందితో కలిసి యువతి ఉన్న ప్రాంతాన్ని గుర్తించి, వ్యవసాయ పొలాల్లో ఉన్న ఆమె వద్దకు చేరుకున్నారు.యువతితో ఓర్పుగా, సానుభూతితో మాట్లాడిన ఎస్‌ఐ సుజిత్, ప్రేమ విఫలమైనంత మాత్రాన జీవితం ముగిసినట్లు కాదని, అది జీవితంలో ఎదురయ్యే ఒక దశ మాత్రమేనని వివరించారు. ఆత్మహత్య ఏ సమస్యకూ పరిష్కారం కాదని, విద్యపై దృష్టి సారించి, భవిష్యత్తును సక్రమంగా నిర్మించుకోవాలని ఆమెకు ధైర్యం చెప్పారు.ఎస్‌ఐ ఇచ్చిన నచ్చచెప్పడంతో యువతి మనసు మారడంతో, ఆమెను సురక్షితంగా వారి తల్లిదండ్రులకు అప్పగించడం జరిగింది.ఈ ఘటనలో తమ కుమార్తె ప్రాణాలను కాపాడిన హద్నూర్ ఎస్‌ఐ సుజిత్‌కు, పోలీస్ సిబ్బందికి యువతి తల్లిదండ్రులు హృదయపూర్వక కృతజ్ఞతలు తెలిపారు. సమయానికి స్పందించి, మానవత్వంతో వ్యవహరించిన పోలీస్ శాఖపై స్థానికులు ప్రశంసలు కురిపించారు.