తిరగలపడి బయటకు వచ్చిన మేక గర్భాశం

యదాస్థానికి చేర్చి కుట్లు వేసి వైద్యంతో మేకను రక్షించిన అసిస్టెంట్ డైరెక్టర్

గత ఇరవై ఎనిమిది సంవత్సరాల్లో మేకల్లో నమోదైన తొలికేసు

కోదాడ పట్టణం రైతు మటన్ సెంటర్ నిర్వాహకులు కొత్తగా కొనుగోలు చేసే జీవాలకు దారి చూపడానికి గత నాలుగు సంవత్సరాలుగా ఒక మేకను పెంచుకుంటున్నారు. అది ఈమధ్య పిల్లలు పెట్టాక రెండు రోజుల క్రితం గర్భాశం తిరగలపడి గుడ్లమాయతో సహా బైటకు వచ్చి రక్తం కారుతూ బైటకు వేలాడుతుంది. పని వత్తిడిలో ఉన్న యజమానులు గమనించుకోకపోవడం తో కారిన రక్తం, మట్టి చెత్త పట్టి గర్భాశయం వాడిపోయింది. శుక్రవారం ఉదయం గమనించిన యజమాని హుటాహుటిన కోదాడ ప్రాంతీయ పశువైద్యశాలకు తరలించారు.

మేకను పరిశీలించిన అసిస్టెంట్ డైరెక్టర్ డా పి పెంటయ్య,యాంటి సెప్టిక్ ద్రావణంతో బైటకు వేలాడుతున్న గర్భాశయాన్ని శుభ్రపరచి, వెన్నెముక మత్తు ఇచ్చి గర్భాశం చిరిగి పోకుండా జాగ్రత్తగా కడుపులోకి అమర్చి తిరిగి బైటకు రాకుండా కుట్లు వేసి తదుపరి వైద్యం అందించి మేక ప్రాణాలను కాపాడారు.ఈ సందర్భంగా అసిస్టెంట్ డైరెక్టర్ డాక్టర్ పెంటయ్య మాట్లాడుతూ.. గర్భాశయం బైటకు రావడం గేదెలు ఆవుల్లో సాధారణం కానీ మేకల్లో ఇలా రావడం అత్యంత అరుదని, ఉద్యోగంలో చేరిన నాటి నుండి నేటి వరకు 28 సంవత్సరాల్లో ఇంతవరకూ మేకల్లో ఇలాంటి కేసు రావడం ఇదే తొలిసారి అని చెప్పారు.గర్భాశయ కండరాల బలహీనత, కాల్షియం పాస్పరస్ మూలకాల లోపం , హార్మోన్ లు విటమిన్ లోపాల వలన ఇలా జరుగుతుందని అన్నారు.చికిత్స అనంతరం మేక చురుకుగా నడుస్తూ ఇంటికి వెళ్ళడంతో యజమాని ఊపిరి పీల్చుకున్నారు.

చికిత్సలో సిబ్బంది చంద్రకళ,కర్ణ పాల్గొన్నారు.