మహిళలకు ఆర్థిక స్వావలంబన కల్పిస్తూ స్వయం ఉపాధి, వ్యాపార అవకాశాలను పెంపొందించేందుకు సెర్ప్–ఇందిరా మహిళా శక్తి ఆధ్వర్యంలో అమలు చేస్తున్న కార్యక్రమాలను బీహార్ రాష్ట్రానికి చెందిన గ్రూప్–1 అధికారుల బృందం ప్రశంసించింది. ఎంసీఆర్ హెచ్‌ఆర్‌డీ హైదరాబాద్‌లో శిక్షణలో భాగంగా సంగారెడ్డి జిల్లాకు వచ్చిన 120 మంది బీహార్ గ్రూప్–1 అధికారులు జిల్లా మహిళా సమాఖ్యను సందర్శించారు. ఈ సందర్భంగా అదనపు డీఆర్‌డీఓ అధికారులు సెర్ప్–ఇందిరా మహిళా శక్తి ద్వారా మహిళా సంఘాల ఆధ్వర్యంలో అమలు చేస్తున్న వివిధ కార్యక్రమాలు, వాటి ద్వారా మహిళలకు అందుతున్న ప్రయోజనాలను అధికారులకు వివరించారు.అనంతరం మహిళా వ్యాపారవేత్తలతో ప్రత్యేకంగా సమావేశమై వారి అనుభవాలను తెలుసుకున్నారు. మహిళా శక్తి పెట్రోల్ బంక్, వాణిజ్య దుకాణ సముదాయం, ఫసల్వాడిలోని కేఎస్‌ఆర్ సాక్స్ యూనిట్‌ను సందర్శించి మహిళా సంఘాలు నిర్వహిస్తున్న కార్యకలాపాలను ప్రత్యక్షంగా పరిశీలించారు. మహిళలకు ఆర్థిక స్వావలంబన కల్పించడంతో పాటు స్వయం ఉపాధి, వ్యాపార అవకాశాలను పెంచడంలో సెర్ప్–మహిళా సంఘాలు చేస్తున్న కృషి అభినందనీయమని బీహార్ గ్రూప్–1 అధికారులు పేర్కొన్నారు. మహిళలను ఆర్థికంగా బలోపేతం చేసి, స్వతంత్రంగా ఎదిగేలా చేయడంలో ఈ కార్యక్రమాలు ఎంతో దోహదపడుతున్నాయని ప్రశంసించారు. కార్యక్రమంలో జిల్లా సమాఖ్య కోశాధికారి, మహిళా సంఘాల సభ్యులు, డీపీఎంలు, ఏపీఎంలు, సీసీలు, జిల్లా సమాఖ్య సిబ్బంది తదితరులు పాల్గొన్నారు.