తెలంగాణ ప్రజాకవి, పద్మవిభూషణ్ డాక్టర్ కాళోజీ నారాయణరావు జయంతిని పురస్కరించుకొని బుధవారం జిల్లా పోలీసు కార్యాలయంలో జిల్లా ఎస్పీ పరితోష్ పంకజ్, ఐపీఎస్ కాళోజీ చిత్రపటానికి పూలమాల వేసి ఘన నివాళులు అర్పించారు. ఈ సందర్భంగా ఎస్పీ మాట్లాడుతూ కాళోజీ నారాయణరావు తెలుగు సాహిత్యానికి, తెలంగాణ ఉద్యమానికి అక్షరయోధుడిగా నిలిచారని కొనియాడారు. తెలంగాణ యాసలో సామాన్య ప్రజలకు సైతం సులభంగా అర్థమయ్యేలా తన కవితల ద్వారా ప్రజల సమస్యలను, భావాలను వ్యక్తం చేశారని తెలిపారు. నిజాం నిరంకుశ పాలనకు వ్యతిరేకంగా పోరాడిన కాళోజీ, స్వాతంత్ర్య ఉద్యమంతో పాటు తెలంగాణ ఉద్యమంలోనూ చురుకుగా పాల్గొన్నారని గుర్తుచేశారు. తెలంగాణ భాష, యాస పరిరక్షణ కోసం ఆయన చేసిన కృషికి గుర్తుగా ప్రభుత్వం ఆయన జయంతిని‘తెలంగాణ భాషా దినోత్సవం’గా నిర్వహిస్తోందన్నారు. అనంతరం అధికారులు, పోలీసు సిబ్బంది కాళోజీ సేవలను స్మరించుకున్నారు. కార్యక్రమంలో అడ్మినిస్ట్రేటివ్ అధికారి పద్మావతి, ఏఆర్ డీఎస్పీ నరేందర్, డీసీఆర్బీ ఇన్‌స్పెక్టర్ రమేష్, ఎస్బీ ఇన్‌స్పెక్టర్ సదా నాగరాజు, ఆర్‌ఐలు సురేష్ నాయక్, రాజశేఖర్, డానియెల్‌తో పాటు కార్యాలయ సిబ్బంది పాల్గొన్నారు.