నారాయణఖేడ్ నియోజకవర్గంలోని నారాయణఖేడ్ మున్సిపల్ పట్టణంలో బాల సమాధానం కేంద్రంలో జిల్లా మహిళా సాధికారత విభాగం ఆధ్వర్యంలో నిర్వహించిన 'మిషన్ శక్తి – బేటీ బచావో బేటీ పడావో' కార్యక్రమంలో భాగంగా అర్హులైన మహిళలకు ఉచితంగా కుట్టు మిషన్లను పంపిణీ చేశారు. ఈ కార్యక్రమానికి ముఖ్య అతిథిగా హాజరైన నారాయణఖేడ్ శాసనసభ్యులు డాక్టర్ పట్లోళ్ల సంజీవరెడ్డి లబ్ధిదారులకు కుట్టు మిషన్లను అందజేశారు. ఈ సందర్భంగా ఆయన మాట్లాడుతూ మహిళలు అన్ని రంగాల్లో రాణిస్తూ ఆర్థికంగా స్వయం సమృద్ధి సాధించడమే ప్రభుత్వ లక్ష్యమని అన్నారు.మహిళలు కేవలం గృహ బాధ్యతలకే పరిమితం కాకుండా ప్రభుత్వం అందిస్తున్న అవకాశాలను సద్వినియోగం చేసుకుని కుట్టు మిషన్ల ద్వారా స్వయం ఉపాధి పొందుతూ కుటుంబ ఆర్థికాభివృద్ధికి తోడ్పడాలని సూచించారు. మహిళల భద్రత, విద్య, సాధికారత కోసం అమలు చేస్తున్న మిషన్ శక్తి, బేటీ బచావో బేటీ పడావో వంటి పథకాలు ఎంతో ఉపయోగకరమని పేర్కొన్నారు. ప్రతి బాలిక విద్యను అభ్యసించి ఉన్నత స్థాయికి చేరుకోవాలని, మహిళల సంక్షేమం, భద్రత, ఉపాధి కల్పనకు ప్రభుత్వం ఎల్లప్పుడూ అండగా ఉంటుందని భరోసా ఇచ్చారు. ఈ కార్యక్రమంలో జిల్లా సంక్షేమ అధికారి లలిత కుమారి, మున్సిపల్ కౌన్సిలర్,బి. రాజు, మహేష్ చౌహన్,రమేష్ చౌహన్, మాజీ ఎంపీటీసీ పండరి రెడ్డి, స్థానిక ప్రజాప్రతినిధులు, నాయకులు, మహిళా సంఘాల ప్రతినిధులు, లబ్ధిదారులు పాల్గొన్నారు.