నల్గొండ

మహిళలు ఆర్థిక పరమైన అంశాల్లో భాగస్వాములు కావడం ద్వారా కుటుంబాలకు వెన్నుదన్నుగా నిలవగలరని రిటైర్డ్ ప్రిన్సిపల్, యూత్ ఫర్ సేవా చాప్టర్ అడ్వైజరీ సభ్యురాలు సుధారాణి అన్నారు. యూత్ ఫర్ సేవా ఆధ్వర్యంలో నిర్వహిస్తున్న కుట్టుమిషన్ శిక్షణ తరగతుల నూతన బ్యాచ్ ఓరియంటేషన్ కార్యక్రమం సోమవారం నిర్వహించారు.

ముఖ్య అతిథిగా హాజరైన సుధారాణి మాట్లాడుతూ మహిళా సాధికారతకు నైపుణ్యాభివృద్ధి శిక్షణలు ఎంతో దోహదపడతాయని చెప్పారు. ఇలాంటి అవకాశాలను సద్వినియోగం చేసుకొని ఆర్థిక స్వావలంబన సాధించాలని శిక్షార్థులకు సూచించారు.

యూత్ ఫర్ సేవా చాప్టర్ కోఆర్డినేటర్ నాగేంద్ర మాట్లాడుతూ సంస్థ దేశవ్యాప్తంగా చేపడుతున్న వివిధ సేవా కార్యక్రమాలను వివరించారు. శిక్షణ కేంద్రం ట్రైనర్ నాగమణి మాట్లాడుతూ ఇప్పటివరకు ఐదు బ్యాచ్లను విజయవంతంగా పూర్తి చేశామని తెలిపారు. శిక్షణ పొందిన వారిలో పలువురు సొంతంగా బుటిక్‌లు ఏర్పాటు చేసుకోగా, మరికొందరు ప్రముఖ బుటిక్‌లలో ఉపాధి పొందుతున్నారని చెప్పారు. ప్రస్తుత బ్యాచ్ శిక్షార్థులు కూడా శిక్షణను సద్వినియోగం చేసుకొని స్వయం ఉపాధి సాధించి కుటుంబాలకు ఆర్థికంగా అండగా నిలవాలని ఆకాంక్షించారు