హయత్‌నగర్: ఉద్యోగుల పెండింగ్ బిల్లులను వెంటనే చెల్లించాలని డిమాండ్ చేస్తూ ప్రభుత్వ డిగ్రీ కళాశాల (జిడిసి) హయత్‌నగర్ సిబ్బంది శుక్రవారం నల్ల బ్యాడ్జీలతో నిరసన చేపట్టారు.

టి.జి.ఇ.జె.ఎ.సి పిలుపు మేరకు కళాశాల ప్రిన్సిపాల్, అధ్యాపకులు, బోధనేతర సిబ్బంది మధ్యాహ్న భోజన విరామ సమయంలో కళాశాల ప్రవేశ ద్వారం వద్ద శాంతియుతంగా ఆందోళన నిర్వహించారు. జీతాలు, బకాయిలు, అలవెన్సుల చెల్లింపులో జరుగుతున్న తీవ్ర జాప్యం ఉద్యోగులను ఆర్థిక ఇబ్బందులకు గురిచేస్తోందని ఆవేదన వ్యక్తం చేశారు.

ప్రభుత్వం వెంటనే స్పందించి పెండింగ్ బిల్లులన్నీ విడుదల చేయాలని డిమాండ్ చేశారు. విద్యా కార్యక్రమాలకు ఎటువంటి అంతరాయం కలగకుండా నిరసన చేపట్టినట్లు తెలిపారు.