రంగారెడ్డి, :

చైతన్యపురి డివిజన్ పరిధిలోని ప్రభాత్ నగర్ కాలనీలో ఉన్న మాధవరెడ్డి కమ్యూనిటీ హాల్‌ను పోలీస్ స్టేషన్‌గా మార్చే ప్రతిపాదనకు కాలనీవాసులు తీవ్రంగా వ్యతిరేకిస్తున్నారు. కమ్యూనిటీ హాల్‌ను పోలీస్ స్టేషన్‌కు ఇవ్వవద్దని వారు ముక్తకంఠంతో అభ్యంతరం వ్యక్తం చేస్తున్నారు.

కాలనీవాసుల వినతిపై స్పందించిన ఎల్.బి.నగర్ శాసనసభ్యులు దేవిరెడ్డి సుధీర్ రెడ్డి అక్కడికి చేరుకొని వారికి సంఘీభావం తెలిపారు. ఈ సందర్భంగా ఆయన మాట్లాడుతూ గతంలో టీమ్స్ హాస్పిటల్ ప్రాంగణంలో పోలీస్ స్టేషన్, విద్యుత్ సబ్ స్టేషన్, పార్క్ కోసం అప్పటి ముఖ్యమంత్రి కె.చంద్రశేఖర్ రావును కోరగా, ఆయన సానుకూలంగా స్పందించి మంజూరు చేసిన విషయాన్ని గుర్తు చేశారు.

ప్రస్తుతం ఆ స్థలాన్ని ఇవ్వడం సాధ్యం కాదని అధికారులు తెలియజేసిన నేపథ్యంలో, ప్రభాత్ నగర్ కమ్యూనిటీ హాల్‌ను పోలీస్ స్టేషన్ కోసం వినియోగించాలనే ప్రతిపాదనపై కాలనీవాసుల అభ్యంతరాలను దృష్టిలో పెట్టుకుని, రెండు మూడు రోజుల్లో రంగారెడ్డి జిల్లా కలెక్టర్‌ను కలిసి ఆ ప్రయత్నాన్ని విరమించుకోవాలని కోరుతామని సుధీర్ రెడ్డి హామీ ఇచ్చారు.

ఈ కార్యక్రమంలో చైతన్యపురి డివిజన్ మాజీ కార్పొరేటర్లు నరసింహ గుప్త, విట్టల్ రెడ్డి, నాయకులు చంద్రశేఖర్ రెడ్డి, సురేందర్ రెడ్డి, ప్రభాత్ నగర్ కాలనీ అధ్యక్షులు బాల్ రెడ్డి, గట్టు శ్రీను, రమణా రెడ్డి, రామారావు, రాజేష్, నాగేందర్, బాలరాజు, విద్యాసాగర్, నరసింహారావు తదితరులు పాల్గొన్నారు.