పరిశ్రమల్లో భద్రతా లోపాలపై గట్టి హెచ్చరిక

జిల్లాలోని పరిశ్రమల్లో అగ్నిప్రమాదాలు, పేలుళ్లు వంటి అవాంఛనీయ ఘటనలు చోటుచేసుకోకుండా యాజమాన్యాలు అప్రమత్తంగా ఉండాలని, భద్రతా నిబంధనలను కచ్చితంగా అమలు చేయాలని జిల్లా కలెక్టర్ హనుమంతరావు హెచ్చరించారు. నిర్లక్ష్యం ప్రాణనష్టాలకు దారితీస్తే కఠిన చర్యలు తీసుకుంటామని స్పష్టం చేశారు.

మంగళవారం వీడియో కాన్ఫరెన్స్ హాల్‌లో కలెక్టర్ హనుమంతరావు, జిల్లా ఎస్పీ అక్షాంక్ష్ యాదవ్, అదనపు కలెక్టర్ భాస్కర్ రావు, అదనపు ఎస్పీ లక్ష్మీనారాయణలతో కలిసి పరిశ్రమల్లో అగ్నిప్రమాదాలు, పేలుళ్ల నివారణ చర్యలపై సమీక్ష సమావేశం నిర్వహించారు.

ప్రమాదకర కర్మాగారాలపై ప్రత్యేక నిఘా

జిల్లాలోని రసాయన, బల్క్ డ్రగ్స్ మరియు ప్రమాదకర కర్మాగారాల్లో భద్రతా ప్రమాణాలు తప్పనిసరిగా అమలు కావాలని కలెక్టర్ ఆదేశించారు. కాలుష్య నియంత్రణ మండలి, అగ్నిమాపక శాఖలు పరస్పర సమన్వయంతో పనిచేయాలని సూచించారు. కార్మికుల ప్రాణ భద్రతే ప్రథమ కర్తవ్యమని పేర్కొన్నారు.

స్టీమ్‌కు ఆటో కట్–ఆఫ్ సిస్టమ్, రియాక్టర్లకు సేఫ్టీ వాల్వులు, రప్చర్ డిస్కులు వంటి కీలక భద్రతా పరికరాలు తప్పనిసరిగా ఏర్పాటు చేయాలని స్పష్టం చేశారు. లోపాలు గుర్తిస్తే ఉపేక్షించబోమని హెచ్చరించారు.

ప్రమాదం జరిగితే తక్షణ చర్యలు

జిల్లా ఎస్పీ అక్షాంక్ష్ యాదవ్ మాట్లాడుతూ, ప్రమాదం సంభవించినప్పుడు స్థానిక ప్రజాప్రతినిధులతో సమన్వయం చేసి, విషవాయువుల ప్రభావం నివాస ప్రాంతాలపై పడకుండా వెంటనే రక్షణ చర్యలు చేపట్టాలని సూచించారు. అత్యవసర పరిస్థితులకు ముందస్తు ప్రణాళిక సిద్ధంగా ఉండాలన్నారు.

రెండు కర్మాగారాలకు నిషేధ ఉత్తర్వులు

తీవ్ర భద్రతా లోపాలు, చట్ట ఉల్లంఘనలు గుర్తించిన నేపథ్యంలో బృందవాన్ లబోరా్టోరీస్ , వి .జె . సాయి కెమికల్స్క కార్మాగారాలకు నిషేధ ఉత్తర్వులు జారీ చేసి, ప్రాసిక్యూషన్ షోకాజ్ నోటీసులు జారీ చేసినట్లు డిప్యూటీ చీఫ్ ఇన్స్పెక్టర్ ఆఫ్ ఫ్యాక్టరీస్ శ్రీదేవి వెల్లడించారు.

సమావేశంలో డీఐసీ రవీందర్, జిల్లా ఫైర్ అధికారి సందేశ్ కుమార్, వైద్య ఆరోగ్యశాఖ అధికారి మనోహర్, డ్రగ్ ఇన్స్పెక్టర్ బాలకృష్ణ తదితరులు పాల్గొన్నారు.