నల్లగొండ జిల్లా కొండమల్లేపల్లి మండల కేంద్రంలో సంచలనం సృష్టించిన నాగార్జున పబ్లిక్ స్కూల్ ప్రిన్సిపల్ కె.రూపారెడ్డి హత్య కేసులో పోలీసులు కీలక పురోగతి సాధించారు. ఈ నెల 11న దారుణ హత్యకు గురైన రూపారెడ్డిని 27 సార్లు కత్తితో పొడిచి హతమార్చినట్లు దర్యాప్తులో వెల్లడైంది. ఈ కేసులో పూర్వ, ప్రస్తుత విద్యార్థులు ముగ్గురు ప్రమేయం ఉన్నట్లు పోలీసుల ప్రాథమిక విచారణలో తేలింది.

కథ మలుపు తిరిగింది ఇలా..

స్కూల్‌కు చెందిన పదో తరగతి విద్యార్థులు ఈ హత్యకు పాల్పడినట్లు పోలీసులు నిర్ధారించారు. హత్యకు కారణంపై పోలీసులు ప్రాథమికంగా ఆరా తీయగా, కొంతకాలం క్రితం గంజాయి తాగుతూ రూపారెడ్డికి పట్టుబడిన ఈ విద్యార్థులకు వెంటనే టీసీలు ఇచ్చి పాఠశాల నుంచి తొలగించారు. దీంతో ఆ విద్యార్థులు ప్రిన్సిపల్‌పై తీవ్ర కక్ష పెంచుకుని, ఆమె ఒంటరిగా దొరికే సమయం కోసం ఎదురుచూశారు అని పోలీసులు అనుమానిస్తున్నారు. మరో కోణంలో పరిశీలిస్తే, గంజాయి తాగుతున్న సమయంలో రూపారెడ్డి తన సెల్‌ఫోన్‌లో వీడియో తీసి, తల్లిదండ్రులకు చూపిస్తానని బెదిరించడం కూడా హత్యకు ఒక కారణమని భావిస్తున్నారు. అలాగే టీసీ ఇచ్చిన కక్షతో పాటు, డబ్బు అవసరం రెండూ ఈ హత్యకు కారణమని పోలీసులు ప్రాథమికంగా అంచనా వేస్తున్నారు.

నగదు, ఐఫోన్ అపహరణ.. గోవాకు పరార్

హత్య అనంతరం నిందితులు ప్రిన్సిపల్ ఇంటి నుంచి సుమారు రూ.4 లక్షల నగదును అపహరించినట్లు పోలీసులు అనుమానిస్తున్నారు. దీంతో పాటు స్మార్ట్‌ఫోన్‌ను కూడా తీసుకెళ్లినట్లు సమాచారం. నగదు దోచుకున్న అనంతరం నిందితులు గోవాకు పారిపోయినట్లు పోలీసులు అనుమానం వ్యక్తం చేస్తున్నారు.

సీసీ కెమెరాలకు చిక్కకుండా పక్కా ప్లాన్

ఈ హత్య వెనుక పక్కా పథకం ఉన్నట్లు దర్యాప్తులో తేలింది. నిందితులు సీసీ కెమెరాలకు చిక్కకుండా, పక్కా ప్లాన్‌తో ఈ హత్యకు పాల్పడటంతో కేసు ఛేదించడం పోలీసులకు సవాలుగా మారింది. ఘటన జరిగిన సమయంలో రూపారెడ్డి భర్త హైదరాబాద్‌కు వెళ్లడంతో ఆమె ఇంట్లో ఒంటరిగా ఉన్నారు. ఈ విషయం తెలిసిన నిందితులు ఆమె ఒంటరిగా ఉన్న సమయాన్ని ఎంచుకుని దాడికి తెగబడ్డారని పోలీసులు భావిస్తున్నారు.

80 మందిని విచారించిన పోలీసులు

కేసు ఛేదనలో భాగంగా పోలీసులు విస్తృత విచారణ చేపట్టారు. ఈ కేసులో భాగంగా సుమారు 80 మందిని పోలీసులు విచారించారు. అనుమానితుల ఆచూకీ కోసం గాలింపు చేపట్టిన పోలీసులు చివరకు ఇబ్రహీంపట్నం వద్ద ముగ్గురు అనుమానితులను అదుపులోకి తీసుకున్నారు. వీరిలో ఇద్దరు రూపారెడ్డి పనిచేస్తున్న అదే పాఠశాలలో పదో తరగతి చదువుతున్న విద్యార్థులుగా గుర్తించారు, మూడో నిందితుడి కోసం పోలీసులు మరింత లోతుగా ఆరా తీస్తున్నారు.

కేసులో మేనేజర్‌పైనా చర్యలు

ఈ కేసు దర్యాప్తులో భాగంగా పాఠశాల నిర్వహణపైనా అనుమానాలు వ్యక్తమయ్యాయి. ఈ నేపథ్యంలో సదరు మేనేజర్‌పై పోలీసులు కేసు నమోదు చేసి రిమాండ్‌కు తరలించినట్లు సమాచారం.

రాష్ట్రవ్యాప్తంగా కలకలం

ఒక ప్రిన్సిపల్‌ను ఆమె స్వయంగా బోధించిన విద్యార్థులే గంజాయి మత్తులో పాశవికంగా హతమార్చడం రాష్ట్రవ్యాప్తంగా తీవ్ర కలకలం రేపింది. చెడు వ్యసనాల బారిన పడిన విద్యార్థులు దైవంతో సమానంగా గౌరవించాల్సిన గురువును పొట్టన పెట్టుకోవడం అందరినీ దిగ్భ్రాంతికి గురిచేసింది. యువతలో పెరుగుతున్న మాదకద్రవ్యాల వినియోగం, దాని దుష్పరిణామాలపై ఈ ఘటన మరోసారి తీవ్ర చర్చకు దారితీసింది. కేసు దర్యాప్తు కొనసాగుతుండగా, నిందితులపై పూర్తిస్థాయి విచారణ అనంతరమే మరిన్ని వివరాలు వెలుగులోకి వచ్చే అవకాశం ఉంది.