వాహనదారులకు 'జీరో ఎన్ఫోర్స్‌మెంట్'తో పోలీసుల అవగాహన..

నిబంధనలు పాటించిన వారికి డీఎస్పీ చేతుల మీదుగా బహుమతులు..

ప్రజాపాలన ప్రగతి ప్రణాళికలో భాగంగా వినూత్న కార్యక్రమం..

​నల్లగొండ : ట్రాఫిక్ నిబంధనలంటే కేవలం జరిమానాలు మాత్రమే కాదని, అవి ప్రాణ రక్షణ కవచాలని నల్లగొండ పోలీసులు వాహనదారులకు వినూత్న రీతిలో వివరించారు. ప్రజాపాలన ప్రగతి ప్రణాళిక 99వ రోజు వేడుకల్లో భాగంగా రాష్ట్ర డీజీపీ శివధర్ రెడ్డి ఆదేశాలతో జిల్లా ఎస్పీ శరత్ చంద్ర పవర్ మార్గదర్శకత్వంలో శనివారం పట్టణంలో ప్రత్యేక అవగాహన కార్యక్రమం నిర్వహించారు. ఈ సందర్భంగా పోలీసులు "జీరో ఎన్ఫోర్స్‌మెంట్" విధానాన్ని అవలంబించారు. సాధారణంగా తనిఖీలు అంటే జరిమానాల భయం ఉండే వాహనదారులకు ఈసారి పోలీసులు కేవలం అవగాహన కల్పించడం ద్వారా ఆశ్చర్యపరిచారు.

ద్విచక్ర వాహనదారులు తప్పనిసరిగా హెల్మెట్ ధరించాలని కార్లలో ప్రయాణించే వారు సీట్ బెల్ట్ పెట్టుకోవాలని వాహన పత్రాలను ఎల్లప్పుడూ వెంట ఉంచుకోవాలని పోలీసులు సూచించారు. ముఖ్యంగా మద్యం సేవించి వాహనాలు నడపడం వల్ల కలిగే ప్రమాదాల గురించి వివరించారు. ఈ కార్యక్రమంలో మరో ఆసక్తికర అంశం ఏమిటంటే ట్రాఫిక్ నియమాలను నిబద్ధతతో పాటిస్తున్న వారిని పోలీసులు ప్రోత్సహించడం. రహదారిపై వెళ్తున్నప్పుడు హెల్మెట్ మరియు సీట్ బెల్ట్ ధరించిన వాహనదారులను గుర్తించి వారిని ఆపి మరీ సత్కరించారు. వేద డాన్స్ అకాడమీ సహకారంతో నల్లగొండ డీఎస్పీ శివరాం రెడ్డి చేతుల మీదుగా క్రమశిక్షణ గల వాహనదారులకు ప్రత్యేక బహుమతులు అందజేశారు. ఈ వినూత్న ప్రయోగం వాహనదారుల్లో ఎంతో ఉత్సాహాన్ని నింపింది. కేవలం చలాన్ల ద్వారా భయపెట్టడం కంటే ఇలా గౌరవించి బహుమతులు ఇవ్వడం వల్ల ప్రజల్లో బాధ్యత పెరుగుతుందని డీఎస్పీ ఈ సందర్భంగా అభిప్రాయపడ్డారు. రోడ్డు భద్రతపై ప్రతి ఒక్కరూ చైతన్యవంతులు కావడమే ఈ కార్యక్రమ ప్రధాన ఉద్దేశమని పోలీసులు వెల్లడించారు. ఈ కార్యక్రమంలో ట్రాఫిక్ విభాగం అధికారులు, సిబ్బంది పాల్గొన్నారు.