మే 10 వరకు పోర్టల్‌లో వివరాల వెల్లడికి అవకాశం..

తొలిసారిగా కుల వివరాల సేకరణ అంతా డిజిటల్ మయం.. కలెక్టర్ బి. చంద్రశేఖర్

నల్గొండ : దేశవ్యాప్తంగా నిర్వహించనున్న ‘జనగణన-2027’ ప్రక్రియలో భాగంగా ప్రజల సౌకర్యార్థం ప్రభుత్వం ప్రవేశపెట్టిన ‘స్వీయ గణన’ (Self Enumeration) విధానాన్ని జిల్లా ప్రజలందరూ సద్వినియోగం చేసుకోవాలని కలెక్టర్ బి. చంద్రశేఖర్ కోరారు. శనివారం కలెక్టరేట్ సమావేశ మందిరంలో ఏర్పాటు చేసిన విలేకరుల సమావేశంలో ఆయన మాట్లాడారు. రాష్ట్రంలో ఈ నెల 26 నుంచి మే 10 వరకు స్వీయ గణన ప్రక్రియ అందుబాటులో ఉంటుందని వెల్లడించారు. ప్రజలు తమ వివరాలను అధికారిక వెబ్ పోర్టల్ se.census.gov.in ద్వారా స్వయంగా నమోదు చేసుకోవాలని, కుటుంబ సభ్యుల్లో ఎవరో ఒకరు 15 నుంచి 20 నిమిషాల్లో ఈ ప్రక్రియను పూర్తి చేయవచ్చని సూచించారు.

నమోదు పూర్తయ్యాక మొబైల్ లేదా ఇమెయిల్‌కు వచ్చే ‘ఎస్.ఈ. ఐడీ’ని భద్రపరుచుకోవాలని తదుపరి దశలో ఎన్యూమరేటర్ ఇంటికి వచ్చినప్పుడు ఈ ఐడీని చూపిస్తే నమోదు ధృవీకరణ పూర్తవుతుందని వివరించారు. జనగణనను ప్రభుత్వం రెండు దశల్లో నిర్వహిస్తోందని కలెక్టర్ తెలిపారు. మే 11 నుండి జూన్ 9 వరకు మొదటి విడతలో ఇళ్ల జాబితా నమోదు, గృహ గణన ఉంటుందని, 2027 ఫిబ్రవరి 9 నుండి 28 వరకు తుది జనగణన ప్రక్రియ జరుగుతుందని పేర్కొన్నారు. రాష్ట్రం ఏర్పడిన తర్వాత మొదటిసారి నిర్వహిస్తున్న ఈ జనగణనను పూర్తిగా డిజిటల్ పద్ధతిలో చేపట్టడమే కాకుండా ఈసారి ప్రత్యేకంగా కులం వివరాలను కూడా నమోదు చేస్తున్నట్లు స్పష్టం చేశారు. జిల్లాలో మొత్తం 5,03,000 గృహాలు ఉండగా, వాటి గణన కోసం 3,729 హౌసింగ్ బ్లాక్ లు, 479 సర్కిళ్లను ఏర్పాటు చేశామన్నారు. ఈ బృహత్తర కార్యక్రమం కోసం 3,179 మంది గణకులు, 531 మంది సూపర్వైజర్లు, 41 మంది చార్జి అధికారులను నియమించినట్లు వెల్లడించారు.​ జనగణన విధుల్లో పాల్గొనే సిబ్బందికి ఇప్పటికే రెండు విడతల శిక్షణ పూర్తి చేశామని ఈ నెల 27 నుంచి మూడో విడత శిక్షణ ఇస్తామని కలెక్టర్ వివరించారు. స్వీయ గణనపై విస్తృత ప్రచారం కల్పించాలని ప్రజలందరూ భాగస్వాములు కావాలని కోరారు. రాష్ట్ర, జాతీయ స్థాయిలో సంక్షేమ పథకాల రూపకల్పనకు ఈ గణాంకాలు ఎంతో కీలకంగా మారుతాయని ఉద్ఘాటించారు. ఈ సమావేశంలో అదనపు కలెక్టర్ జె. శ్రీనివాస్, సి.పి.ఓ. శ్రీనివాస్ నాయక్, డి.పి.ఆర్.ఓ. యు. వెంకటేశ్వర్లు తదితరులు పాల్గొన్నారు.