కూసుమంచి: పాలేరు నియోజకవర్గ మాజీ ఎమ్మెల్యే కండల ఉపేందర్ రెడ్డి కు కూసుమంచి మండల కేంద్రంలో ఆదివారం ఘన సన్మానం నిర్వహించారు. మండలంలోని సి.ఎస్‌.ఐ ఇమ్మానుయేల్ చర్చిలో జరిగిన కార్యక్రమంలో చర్చి సంఘస్తులు ఆయనకు పుష్పగుచ్ఛాలు అందించి స్వాగతం పలికారు. అనంతరం పూలు చల్లుతూ ర్యాలీగా చర్చిలోకి తీసుకువెళ్లి పూలమాలలు, శాలువాలతో ఘనంగా సత్కరించారు.

ఈ సందర్భంగా సంఘ పెద్దలు మాట్లాడుతూ ఆయన ఎమ్మెల్యేగా ఉన్న సమయంలో చర్చి అభివృద్ధికి అందించిన సహాయాన్ని గుర్తు చేశారు. చర్చి ఎక్స్టెన్షన్ బలిపీఠ నిర్మాణానికి రూ.5 లక్షలు విరాళంగా అందించడంతో బలిపీఠ నిర్మాణం, టైల్స్ వేయడం, చర్చి పరిసరాలను అభివృద్ధి చేయడం సాధ్యమైందని తెలిపారు. అలాగే కూసుమంచి పాస్ట్రేట్ పరిధిలోని పాత కూసుమంచి చర్చి ప్రహారీ గోడ నిర్మాణానికి రూ.90 వేలు, ఇమ్మానుయేల్ చర్చికి రూ.3 లక్షలు, గట్టు సింగారం చర్చికి రేకుల నిర్మాణానికి రూ.60 వేలు, ఉర్లుగొండ చర్చి ప్రహరీ నిర్మాణానికి రూ.30 వేలు, నాయకన్ గూడెం చర్చికి విద్యుత్ ఉపకరణాల కోసం రూ.20 వేలు ఖర్చు చేసినట్లు తెలిపారు. మొత్తం రూ.5 లక్షలతో ఐదు చర్చిల అభివృద్ధి జరిగిందని పేర్కొన్నారు.

ఈ సందర్భంగా కందాళ ఉపేందర్ రెడ్డి మాట్లాడుతూ ప్రజలకు చిన్న చిన్న సమస్యలు వచ్చినప్పుడు తమవంతు సహాయం చేయడం తన బాధ్యతగా భావిస్తానన్నారు. ప్రజలు ఇబ్బంది పడుతుంటే తనకు బాధ కలుగుతుందని, ఎవరికైనా సమస్య ఉంటే తన వద్దకు వచ్చినపుడు సాధ్యమైనంతవరకు సహాయం అందిస్తానని తెలిపారు. భవిష్యత్తులో కూడా పాలేరు నియోజకవర్గ ప్రజలకు సేవ చేయడానికి సిద్ధంగా ఉంటానని అన్నారు.

ఈ కార్యక్రమంలో కోదాడ గ్రూప్ చైర్మన్ రెవరెండ్ రమేష్, కూసుమంచి పాస్ట్రేట్ చైర్మన్ శ్రీనివాస్, భారత్ రాష్ట్ర సమితి మండల కమిటీ నాయకులు వేముల వీరయ్య, ఎండి ఆసీపాషా, ఇతర నాయకులు, సంఘ పెద్దలు తదితరులు పాల్గొన్నారు.