నారాయణఖేడ్ స్థానిక ప్రతినిధి కృష్ణ :లయన్స్ క్లబ్ ఆఫ్ నారాయణఖేడ్ ఆధ్వర్యంలో నారాయణఖేడ్ ప్రాంత ప్రజలకు నాణ్యమైన కంటి వైద్య సేవలు అందించాలనే ఉద్దేశంతో కొండ ప్రాంతంలో లయన్స్ కంటి ఆసుపత్రి ఏర్పాటు చేయుటకు నిర్ణయం తీసుకున్నారు.ఈ నేపథ్యంలో ఆసుపత్రి నిర్మాణానికి అవసరమైన స్థల కేటాయింపును కోరుతూ జిల్లా పాలనకు వినతిపత్రం సమర్పించబడింది.ఈ వినతిపత్రాన్ని చార్టర్ అధ్యక్షుడు, నారాయణఖేడ్ శాసనసభ్యుడు లయన్ డాక్టర్ పట్లోళ్ల సంజీవ రెడ్డి చేతుల మీదుగా జిల్లా కలెక్టర్ ప్రవీణ్యకు లయన్స్ క్లబ్ అధ్యక్షుడు బావుగి సాయి సంగమేశ్వర్, జోన్ అధ్యక్షుడు బి. రాజ్ కుమార్, సీనియర్ లయన్స్ సభ్యుడు దిగంబర రావు, మాజీ అధ్యక్షుడు డి. వెంకట్రావు కలిసి అందజేశారు.నారాయణఖేడ్ మరియు పరిసర గ్రామాల ప్రజలు ప్రస్తుతం కంటి వైద్య సేవల కోసం దూర ప్రాంతాలకు వెళ్లాల్సిన పరిస్థితి నెలకొని ఉందని, దీనివల్ల పేద మరియు మధ్య తరగతి ప్రజలు తీవ్ర ఇబ్బందులు ఎదుర్కొంటున్నారని లయన్స్ క్లబ్ ప్రతినిధులు వినతిపత్రంలో పేర్కొన్నారు. ఈ పరిస్థితిని దృష్టిలో ఉంచుకొని స్థానికంగానే నాణ్యమైన కంటి వైద్య సేవలు అందించేందుకు లయన్స్ కంటి ఆసుపత్రి ఏర్పాటు ఎంతో అవసరమని వివరించారు.ప్రతిపాదిత లయన్స్ కంటి ఆసుపత్రి ద్వారా ఉచిత కంటి పరీక్షలు, శస్త్రచికిత్సలు, కళ్లద్దాల పంపిణీతో పాటు నిరంతర వైద్య సేవలు అందించాలనే లక్ష్యంతో లయన్స్ క్లబ్ ముందుకు సాగుతుందని తెలిపారు. ఈ ఆసుపత్రి ఏర్పాటు వల్ల కొండ ప్రాంత ప్రజలకు, గ్రామీణ ప్రాంత వాసులకు ఎంతో మేలు జరుగుతుందని పేర్కొన్నారు.అందువల్ల ప్రజారోగ్యాన్ని దృష్టిలో ఉంచుకొని కొండ ప్రాంతంలో లయన్స్ కంటి ఆసుపత్రి నిర్మాణానికి అనువైన స్థలాన్ని కేటాయించాలని జిల్లా పాలనను లయన్స్ క్లబ్ ఆఫ్ నారాయణఖేడ్ విజ్ఞప్తి చేసింది.