చిట్యాల మున్సిపాలిటీలో నూతన పాలకవర్గ ప్రమాణ స్వీకారానికి అధికార యంత్రాంగం సమగ్ర ఏర్పాట్లు పూర్తి చేసింది. ఆదివారం నిర్వహించనున్న ఈ కార్యక్రమం కోసం మున్సిపల్ కార్యాలయం వద్ద ప్రత్యేక వేదిక, భద్రతా ఏర్పాట్లు, ఆహ్వానితుల కూర్చొనే ఏర్పాట్లు చేపట్టినట్లు అధికారులు తెలిపారు.ఈ ప్రమాణ స్వీకార కార్యక్రమానికి నల్గొండ జిల్లా పరిశ్రమల శాఖ జనరల్ మేనేజర్ జి. సతీష్ ముఖ్య అతిథిగా హాజరై నూతన కౌన్సిలర్లతో ప్రమాణ స్వీకారం చేయించనున్నారు. ఉదయం 11 గంటలకు కౌన్సిలర్ల ప్రమాణ స్వీకారం జరగనుండగా, అనంతరం మధ్యాహ్నం 2.30 గంటలకు చైర్మన్, వైస్ చైర్మన్ ఎన్నికలు నిర్వహించనున్నట్లు మున్సిపల్ కమిషనర్ దండు శ్రీను మీడియాకు వెల్లడించారు.

కార్యక్రమాన్ని ప్రశాంతంగా, పారదర్శకంగా నిర్వహించేందుకు అవసరమైన అన్ని ఏర్పాట్లు పూర్తి చేసినట్లు ఆయన తెలిపారు. ఎన్నికైన ప్రజాప్రతినిధులు పట్టణ అభివృద్ధికి కట్టుబడి పనిచేయాలని స్థానిక ప్రజలు ఆకాంక్షిస్తున్నారు. కొత్త పాలకవర్గం పట్టణ సమస్యల పరిష్కారంపై దృష్టి సారించి అభివృద్ధి దిశగా ముందడుగు వేయాలనే ఆశాభావం వ్యక్తమవుతోంది.