చిట్యాలలో బీఆర్ఎస్ వినూత్న నిరసన.. నిర్మాణ పనులు వెంటనే పూర్తి చేయాలని డిమాండ్.

నల్గొండ జిల్లా

చిట్యాల పట్టణ కేంద్రంలో గత రెండేళ్లుగా కొనసాగుతున్న ఫ్లైఓవర్ నిర్మాణ పనుల ఆలస్యంపై బీఆర్ఎస్ నాయకులు గురువారం వినూత్న రీతిలో నిరసన వ్యక్తం చేశారు. ఫ్లైఓవర్ బ్రిడ్జి కింద కళ్లకు గంతలు కట్టుకుని ఆందోళనకు దిగిన వారు, పనుల నిర్లక్ష్యాన్ని ఎండగట్టారు.

హైదరాబాద్–విజయవాడ జాతీయ రహదారిపై అత్యంత రద్దీ ప్రాంతమైన చిట్యాల వద్ద ఫ్లైఓవర్ నిర్మాణం నత్తనడకన సాగుతుండటంతో నిత్యం ట్రాఫిక్ సమస్య తీవ్ర రూపం దాల్చుతోందని నాయకులు ఆవేదన వ్యక్తం చేశారు. వాహనాలు కిలోమీటర్ల మేర నిలిచిపోతుండటంతో ప్రయాణికులు గంటల తరబడి ఇబ్బందులు పడుతున్నారని తెలిపారు.

ఆరు నెలల్లో పనులు పూర్తి చేస్తామని హామీ ఇచ్చిన కాంట్రాక్టర్ ఇప్పటివరకు పనుల పురోగతిపై స్పష్టత ఇవ్వలేదని ఆరోపించారు. ఫ్లైఓవర్ పనుల కారణంగా పట్టణ ప్రజలు రోడ్లు దాటడానికే నరకయాతన అనుభవిస్తున్నారని, వ్యాపారులు, విద్యార్థులు, ఉద్యోగులు తీవ్ర ఇబ్బందులు ఎదుర్కొంటున్నారని పేర్కొన్నారు.ప్రజల సహనాన్ని పరీక్షిస్తున్న ఈ పరిస్థితిపై సంబంధిత అధికారులు వెంటనే స్పందించి, ఫ్లైఓవర్ నిర్మాణ పనులను యుద్ధప్రాతిపదికన పూర్తి చేయాలని బీఆర్ఎస్ నాయకులు డిమాండ్ చేశారు. పనులు పూర్తి కాకపోతే ప్రజలతో కలిసి మరింత ఉధృతంగా ఆందోళనలు చేపడతామని హెచ్చరించారు.