నారాయణఖేడ్ స్థానికం ప్రతినిధి కృష్ణ:తెలంగాణలో జర్నలిస్టులపై జరుగుతున్న అక్రమ అరెస్టులను తీవ్రంగా ఖండిస్తున్నామని తెలంగాణ వర్కింగ్ జర్నలిస్ట్ ఫెడరేషన్ (టీడబ్ల్యూజేఎఫ్) రాష్ట్ర ఉపాధ్యక్షులు, జిల్లా అధ్యక్షులు ఎల్గోయి ప్రభాకర్ అన్నారు. ఆయన గురువారం ఒక ప్రకటనలలో మాట్లాడుతూ, ప్రజాస్వామ్య వ్యవస్థలో నాలుగో స్థంభంగా ఉన్న మీడియాను అణిచివేయడానికి పాలకులు ప్రయత్నించడం దురదృష్టకరమన్నారు.

ప్రజా సమస్యలను వెలుగులోకి తీసుకువస్తున్న జర్నలిస్టులపై అక్రమ కేసులు పెట్టి, అరెస్టులు చేయడం ద్వారా భయబ్రాంతులకు గురి చేయాలనే ప్రయత్నం జరుగుతోందని ఆయన ఆవేదన వ్యక్తం చేశారు. ఇది రాజ్యాంగం కల్పించిన భావప్రకటన స్వేచ్ఛపై దాడిగా పేర్కొన్నారు.

జర్నలిస్టులు ఎలాంటి తప్పు చేయకపోయినా పోలీసుల ద్వారా అరెస్టులు చేయడం, వేధింపులకు గురి చేయడం ప్రజాస్వామ్య విలువలకు విరుద్ధమని తెలిపారు. ప్రభుత్వం వెంటనే ఈ అరెస్టులను ఉపసంహరించుకుని, జర్నలిస్టులకు విడుదల చేయాలని డిమాండ్ చేశారు.

ఇలాంటి ఘటనలు పునరావృతం కాకుండా జర్నలిస్టుల రక్షణకు ప్రత్యేక చర్యలు తీసుకోవాలని, మీడియా స్వేచ్ఛను కాపాడాలని ఆయన ప్రభుత్వాన్ని కోరారు. జర్నలిస్టుల హక్కుల పరిరక్షణ కోసం అవసరమైతే రాష్ట్రవ్యాప్తంగా ఉద్యమాలకు టిడబ్ల్యూజీఎఫ్ సిద్ధంగా ఉందని హెచ్చరించారు.