రామన్నపేటలో పోలీసులు వెహికల్ చెకింగ్ రోడ్డు భద్రతపై అవగాహన

యాదాద్రి భువనగిరి జిల్లా, రామన్నపేట మండలంలో రోడ్డు భద్రతపై పోలీసులు ప్రత్యేక దృష్టి సారించారు. సీఐ ఎన్. వెంకటేశ్వర్లు, ఎస్సై డి. నాగరాజు ఆధ్వర్యంలో మంగళవారం ప్రధాన రహదారులపై విస్తృతంగా వెహికల్ చెకింగ్ నిర్వహించారు.

ఈ సందర్భంగా వాహనదారుల పత్రాలు పరిశీలించడంతో పాటు ట్రాఫిక్ నిబంధనలు పాటించని వారిపై చర్యలు తీసుకున్నారు. ముఖ్యంగా ద్విచక్ర వాహనదారులు తప్పనిసరిగా హెల్మెట్ ధరించాలని పోలీసులు స్పష్టంగా సూచించారు.

హెల్మెట్ లేకుండా ప్రయాణించడం ప్రమాదకరమని, చిన్న నిర్లక్ష్యం ప్రాణాంతకంగా మారే అవకాశం ఉందని హెచ్చరించారు. రోడ్డు ప్రమాదాలను తగ్గించాలంటే ప్రతి ఒక్కరూ ట్రాఫిక్ నిబంధనలు పాటించాల్సిన అవసరం ఉందని ఈ సందర్భంగా వారు తెలిపారు. ఈ కార్యక్రమంలో ఏఎస్ఐ సురేందర్,కానిస్టేబుల్ నరసింహ, సురేష్, మధు, ప్రవీణ్,హనుమంతు తదితరులు పాల్గొన్నారు.