99 రోజుల ప్రజాపాలన ప్రగతి ప్రణాళికలో భాగంగా జిల్లాలో ఏప్రిల్ 6 నుంచి 11 వరకు “హెల్త్ వీక్” కార్యక్రమాలు నిర్వహించనున్నట్లు జిల్లా కలెక్టర్ అనురాగ్ జయంతి తెలిపారు. శనివారం కలెక్టరేట్‌లో జిల్లా వైద్య ఆరోగ్యశాఖ ఆధ్వర్యంలో జరిగిన సమీక్ష సమావేశంలో కార్యక్రమాల అమలుపై అధికారులకు దిశానిర్దేశం చేశారు. ఈ సమావేశంలో అదనపు కలెక్టర్ (లోకల్ బాడీ) భాస్కర్ రావు పాల్గొన్నారు.

హెల్త్ వీక్‌లో భాగంగా ప్రతి రోజుకు ప్రత్యేక థీమ్‌తో కార్యక్రమాలు చేపడుతున్నట్లు వెల్లడించారు. ఫుడ్ సేఫ్టీ ఫోకస్ డే సందర్భంగా భువనగిరిలో ఈట్ రైట్ వాక్, అవగాహన ర్యాలీలు, కల్తీ పరీక్షల ప్రదర్శనలు నిర్వహించనున్నారు. వరల్డ్ హెల్త్ డే సందర్భంగా వైద్య సిబ్బందికి అవార్డులు ప్రదానం చేయనున్నారు.

సేఫ్ మదర్ డే రోజున గర్భిణీలు, బాలింతలకు ప్రత్యేక సేవలు, గ్రామస్థాయిలో ఆరోగ్య శిబిరాలు నిర్వహించనున్నారు. 28 రోజులలోపు శిశువులు, బాలింతలను గుర్తించి ఇంటింటి సందర్శనల ద్వారా ఆరోగ్య సేవలు అందించేందుకు యాక్షన్ ప్లాన్ సిద్ధం చేయాలని అధికారులను ఆదేశించారు. జిల్లా డయాగ్నస్టిక్ సెంటర్‌లో ఉచిత పరీక్షలపై గ్రామస్థాయిలో విస్తృత ప్రచారం చేయాలని సూచించారు.

ఎయిడ్స్ అవగాహన దినం సందర్భంగా రెడ్ రన్, స్క్రీనింగ్ క్యాంపులు, విద్యార్థులకు పోటీలు నిర్వహించనున్నారు. హోమియోపతి దినోత్సవం సందర్భంగా మెగా ఆయుష్ వైద్య శిబిరం, యోగా కార్యక్రమాలు చేపట్టనున్నారు.

డ్రగ్స్ కంట్రోల్ డే రోజున డ్రగ్ దుర్వినియోగ నియంత్రణపై అవగాహన ర్యాలీలు, కళాశాలల్లో వ్యాసరచన, క్విజ్ పోటీలు నిర్వహించనున్నారు. అలాగే ఆసుపత్రుల్లో మత్తు పదార్థాల నివారణ సేవలను సమీక్షించనున్నారు.

జిల్లాలోని అన్ని శాఖలు సమన్వయంతో పనిచేసి హెల్త్ వీక్ కార్యక్రమాలను విజయవంతం చేయాలని కలెక్టర్ ఆదేశించారు. ప్రతి రోజు కార్యక్రమాలపై నివేదికలు సమర్పించాలని సూచించారు.

ఇక NQAS ప్రమాణాల సాధన కోసం ప్రతి ప్రాథమిక ఆరోగ్య కేంద్రానికి ఇంజనీర్లను కేటాయించి, పెండింగ్ సివిల్ పనులపై అంచనాలు సిద్ధం చేయాలని ఆదేశించారు.

ఈ సమావేశంలో జిల్లా వైద్యాధికారులు, వివిధ శాఖల అధికారులు, ఇంజనీర్లు పాల్గొన్నారు.