విద్యార్థులు గంజాయి, మత్తు పదార్థాలు, ఇతర చెడు వ్యసనాలకు గురికాకుండా తల్లిదండ్రులు, ఉపాధ్యాయులు నిరంతరం అప్రమత్తంగా ఉండాలని డీవైఎఫ్‌ఐ జిల్లా కార్యదర్శి మల్లం మహేష్ పిలుపునిచ్చారు. విద్యార్థుల భవిష్యత్తును నాశనం చేసే మత్తు పదార్థాల నియంత్రణపై ప్రభుత్వం ప్రత్యేక దృష్టి సారించాలని ఆయన డిమాండ్ చేశారు.

పాఠశాల ప్రిన్సిపల్ రూపారెడ్డి హత్యను నిరసిస్తూ నల్లగొండ క్లాక్ టవర్ సెంటర్‌లో డీవైఎఫ్‌ఐ ఆధ్వర్యంలో క్యాండిల్ ర్యాలీ నిర్వహించారు. ఈ సందర్భంగా రూపారెడ్డి చిత్రపటానికి నివాళులర్పించిన నాయకులు, కొవ్వొత్తులతో ర్యాలీ చేపట్టి ఆమె మృతికి సంతాపం వ్యక్తం చేశారు. విద్యార్థుల భవిష్యత్తు కోసం పనిచేసిన ఒక విద్యావేత్తను కోల్పోవడం సమాజానికి తీరని లోటని వారు ఆవేదన వ్యక్తం చేశారు.

ఈ సందర్భంగా మల్లం మహేష్ మాట్లాడుతూ.. ఒక విద్యావేత్తగా, సమాజం పట్ల అవగాహన కలిగిన వ్యక్తిగా విద్యార్థుల అభ్యున్నతి కోసం పనిచేసిన రూపారెడ్డి మరణం తీవ్రంగా కలచివేసిందన్నారు. విద్యార్థులకు పాఠ్యపుస్తకాల్లోని విద్యతో పాటు క్రమశిక్షణ, నైతిక విలువలు, సామాజిక బాధ్యత, మంచి ఆలోచనా విధానాన్ని అలవర్చాల్సిన అవసరం ఉందన్నారు.

ప్రస్తుత పరిస్థితుల్లో యువతను మత్తు పదార్థాల వైపు ఆకర్షించే ప్రయత్నాలు ఆందోళన కలిగిస్తున్నాయని ఆయన అన్నారు. విద్యార్థుల భవిష్యత్తును దృష్టిలో ఉంచుకుని పాఠశాలల్లో మత్తు పదార్థాల దుష్ప్రభావాలపై అవగాహన కార్యక్రమాలు నిర్వహించాలని కోరారు. విద్యార్థుల్లో ప్రవర్తనలో వచ్చే మార్పులను ఉపాధ్యాయులు గుర్తించి, వారితో స్నేహపూర్వకంగా మాట్లాడి సరైన మార్గనిర్దేశం చేయాలని సూచించారు.

తల్లిదండ్రులు కూడా తమ పిల్లల ప్రవర్తన, స్నేహితుల పరిచయాలు, రోజువారీ కార్యకలాపాలపై నిరంతరం దృష్టి పెట్టాలని మహేష్ సూచించారు. పిల్లలతో భయపెట్టి కాకుండా స్నేహపూర్వక వాతావరణంలో మాట్లాడి వారి సమస్యలను తెలుసుకోవాలని అన్నారు. విద్యార్థులు ఏదైనా సమస్య ఎదుర్కొంటున్నప్పుడు దానిని తల్లిదండ్రులు, ఉపాధ్యాయులతో పంచుకునే విధంగా నమ్మకమైన వాతావరణాన్ని కల్పించాలని కోరారు.

మత్తు పదార్థాల విక్రయాలను అరికట్టడంలో పోలీసులు కఠినంగా వ్యవహరించాలని డీవైఎఫ్‌ఐ నాయకులు డిమాండ్ చేశారు. విద్యార్థులు, యువతను లక్ష్యంగా చేసుకుని మత్తు పదార్థాల విక్రయాలు జరిపే వారిపై కఠిన చర్యలు తీసుకోవాలని కోరారు. పాఠశాలలు, కళాశాలల పరిసర ప్రాంతాల్లో ప్రత్యేక నిఘా ఏర్పాటు చేసి మత్తు పదార్థాల సరఫరాను పూర్తిగా అరికట్టాలని అన్నారు.

యువతను చెడు వ్యసనాలకు దూరంగా ఉంచడం ఒక్క ప్రభుత్వ బాధ్యత మాత్రమే కాదని, సమాజంలోని ప్రతి ఒక్కరి బాధ్యత అని మహేష్ పేర్కొన్నారు. ప్రభుత్వం, పోలీసులు, తల్లిదండ్రులు, ఉపాధ్యాయులు, ప్రజా సంఘాలు సమిష్టిగా కృషి చేసినప్పుడే విద్యార్థుల భవిష్యత్తును కాపాడగలమన్నారు. రూపారెడ్డి హత్యకు బాధ్యులపై కఠిన చర్యలు తీసుకుని, ఇలాంటి ఘటనలు పునరావృతం కాకుండా ప్రభుత్వం చర్యలు చేపట్టాలని డిమాండ్ చేశారు.

ఈ కార్యక్రమంలో డీవైఎఫ్‌ఐ మాజీ జిల్లా అధ్యక్షులు కట్ట ప్రభాత్, నల్లగొండ పట్టణ అధ్యక్ష కార్యదర్శులు పాలాది కార్తీక్, గుండాల నరేష్, నాయకులు కార్లపూడి రాము, మాదాసు రావణ్, యువరాజ్, వేణుచారి, శ్రీకాంత్, కిరణ్, నాగేష్, కుమార్, రఘు, అనిల్, యశ్వంత్, గిరి, శ్రవణ్, సుధాకర్ తదితరులు పాల్గొన్నారు.