నారాయణఖేడ్ నియోజకవర్గం నారాయణఖేడ్ మండలం చప్తాకే గ్రామంలోని అంగన్వాడీ కేంద్రంలో సంవత్సరం ముగింపు సందర్భంగా యానివల్ డే కార్యక్రమాన్ని అంగన్వాడీ టీచర్ జగదేవి ఆధ్వర్యంలో నిర్వహించారు. ఈ కార్యక్రమంలో గ్రామ సర్పంచ్ మెత్రి సంగమ్మ ముఖ్య అతిథిగా పాల్గొన్నారు. ఈ సందర్భంగా జగదేవి మాట్లాడుతూ మూడు సంవత్సరాల వయస్సు నుంచే పిల్లలను అంగన్వాడీ కేంద్రాల్లో చేర్పించడం ద్వారా వారికి క్రమశిక్షణ, మంచి అలవాట్లు, ప్రాథమిక విద్యతో పాటు సామాజిక విలువలు కూడా అలవడతాయని తెలిపారు. ఆటలు, సాంస్కృతిక కార్యక్రమాల ద్వారా పిల్లల ప్రతిభను వెలికి తీసి ప్రోత్సహించడం జరుగుతుందని చెప్పారు. కార్యక్రమంలో చిన్నారులు జంతువుల వేషధారణలో పాల్గొని అందరినీ ఆకట్టుకోగా, 4+ మరియు 5+ వయస్సు గల పిల్లలకు అసెస్‌మెంట్ కార్డులను అందజేశారు. ఈ కార్యక్రమంలో ఉపసర్పంచ్ బస్వారాజ్, హై స్కూల్ మరియు ప్రైమరీ స్కూల్ ప్రధాన ఉపాధ్యాయులు, సీడీపీఓ సుజాత, సూపర్వైజర్ మంజుల తదితరులు పాల్గొని కార్యక్రమాన్ని విజయవంతం చేశారు.