కాకినాడ, భార్య వివాహేతర సంబంధం పెట్టుకుందనే అనుమానంతో భర్త ఆత్మహత్య చేసుకున్న ఘటన జిల్లాలో విషాదం నింపింది. కాజులూరు మండలం శీల గ్రామానికి చెందిన కృష్ణా లోవరాజు (పేరు మార్పు) ఈ ఘటనకు పాల్పడ్డాడు.

పోలీసుల వివరాల ప్రకారం… లోవరాజుకు సీతారామపురానికి చెందిన విజయ వనితాదేవితో సుమారు 18 ఏళ్ల క్రితం వివాహం జరిగింది. కొంతకాలంగా దంపతుల మధ్య మనస్పర్థలు నెలకొనడంతో భార్య పుట్టింటికి వెళ్లిపోయింది.

ఈ నేపథ్యంలో ఇంట్లో ఎవరూ లేని సమయంలో లోవరాజు సెల్ఫీ వీడియో రికార్డు చేసి, భార్యపై వివాహేతర సంబంధం ఆరోపణలు చేస్తూ తాను ఆత్మహత్య చేసుకుంటున్నట్లు పేర్కొన్నాడు. పలుమార్లు చెప్పినా మార్పు రాలేదని, మానసికంగా ఇబ్బందులు ఎదుర్కొంటున్నానని వీడియోలో వెల్లడించాడు.

తర్వాత అతడు ఆత్మహత్య చేసుకున్నాడు. సమాచారం అందుకున్న పోలీసులు ఘటనాస్థలికి చేరుకుని మృతదేహాన్ని స్వాధీనం చేసుకుని పోస్టుమార్టం నిమిత్తం తరలించారు. కేసు నమోదు చేసి దర్యాప్తు చేపట్టారు.