విద్యార్థి ఉద్యమకారుడి సాహితీ సమరం

పుస్తకావిష్కరణలో ప్రొఫెసర్ కాసిం, ఎమ్మెల్సీ నెల్లికంటి సత్యం

మాజీ విద్యార్థి నాయకుడు, తెలంగాణ ఉద్యమకారుడు, అడ్వకేట్ కట్టెల లింగస్వామి రచించిన ‘కలం కవాతు’ పుస్తకావిష్కరణ కార్యక్రమం చౌటుప్పల్‌లోని బిఆర్‌కే కన్వెన్షన్ హాల్ (పాత నవోదయ థియేటర్)లో ఘనంగా జరిగింది. తెలంగాణ ఉద్యమకారుడు ఉప్పు కృష్ణ అధ్యక్షతన జరిగిన ఈ కార్యక్రమానికి ఉస్మానియా విశ్వవిద్యాలయం ఆర్ట్స్ కళాశాల ప్రిన్సిపల్, ప్రముఖ రచయిత ప్రొఫెసర్ కాసిం, ఎమ్మెల్సీ నెల్లికంటి సత్యం, ప్రజానాట్యమండలి రాష్ట్ర అధ్యక్షుడు కే. శ్రీనివాసులు ముఖ్య అతిథులుగా హాజరయ్యారు.​ఈ సందర్భంగా ప్రొఫెసర్ కాసిం మాట్లాడుతూ.. సమాజంలో జరుగుతున్న అనేక అంశాల ఆధారంగా అక్షరాలను పేర్చి అద్భుతమైన పుస్తకాన్ని అందించిన కట్టెల లింగస్వామిని అభినందించారు. పోరాట నేపథ్యం ఉన్న ఈ ప్రాంతం నుంచి తెలంగాణ ఉద్యమంలో కీలక పాత్ర పోషించి, నేడు సాహితీ రంగంలో తొలి అడుగు వేయడం అభినందనీయమన్నారు. కవి తన స్వీయ అనుభవాలతో పాటు ప్రజల జీవన విధానాన్ని ఈ పుస్తకంలో చక్కగా ఆవిష్కరించారని కొనియాడారు. ​ఎమ్మెల్సీ నెల్లికంటి సత్యం మాట్లాడుతూ.. స్థానిక నిరుద్యోగం, కాలుష్యం వంటి ప్రజా సమస్యలపై విద్యార్థులు, యువత స్పందించేలా చైతన్యవంతమైన కవితలు, పుస్తకాలు రావలసిన అవసరం ఉందన్నారు. మాజీ ఏఐఎస్‌ఎఫ్ నాయకునిగా, అధ్యాపకుడిగా, రచయితగా సేవలు అందిస్తూ సమాజానికి ఉపయోగపడే పుస్తకాన్ని తీసుకురావడం హర్షణీయమన్నారు. దేశంలో జరుగుతున్న వివిధ ఉద్యమాలకు ఇటువంటి రచనలు స్ఫూర్తిగా నిలుస్తాయని పేర్కొన్నారు. అనంతరం రచయిత కట్టెల లింగస్వామిని పూర్వ ఏఐఎస్‌ఎఫ్ నాయకులు, మిత్రులు ఘనంగా సన్మానించారు.​ఈ కార్యక్రమంలో వివిధ సంఘాల ప్రతినిధులు బచ్చనగోని గాలయ్య, జిల్లా యాదయ్య, బోరం ప్రకాష్ రెడ్డి, తాడూరి పరమేష్, బాతరాజు సత్యం, బోయ రామచంద్రం, లింగస్వామి, మల్లేష్, చిలకరాజు రాజు, సంజీవ, కొండూరు వెంకటేశం, తిగుళ్ల శ్రీనివాస్, కార్తీక్ గౌడ్, చింతల సాయిలు, ఎండి ఖయ్యూం, తడక మోహన్, కాకి సుందర్, వివిధ కళాశాలల ప్రతినిధులు విష్ణుకుమార్, మహేందర్ రెడ్డి, శ్రీనివాస్, శేఖర్ రెడ్డి, విద్యార్థిని విద్యార్థులు, వివిధ సంఘాల నాయకులు, కార్యకర్తలు పాల్గొన్నారు.