ఎస్‌ఐఆర్‌ నోటీసుల ప్రక్రియను నిర్ణీత గడువులోగా పూర్తి చేసేందుకు కంగ్టి మండల రెవెన్యూ సిబ్బంది గురువారం సాయంత్రం 6 గంటలు దాటినా విధుల్లో నిమగ్నమయ్యారు. సబ్‌ కలెక్టర్‌ ఆదేశాల మేరకు నోటీసుల పంపిణీ, దరఖాస్తుల పరిశీలన, వివరాల నమోదు, పెండింగ్‌ పనుల పూర్తి వంటి కార్యక్రమాలను సిబ్బంది కొనసాగించారు. అక్టోబర్‌ 8ను చివరి గడువుగా నిర్ణయించడంతో పనులు సకాలంలో పూర్తయ్యేలా అధికారులు ప్రత్యేక దృష్టి సారించారు. కార్యాలయ సమయం ముగిసినప్పటికీ అదనపు సమయం కేటాయించి రికార్డులు, దరఖాస్తులు, నోటీసులకు సంబంధించిన వివరాలను పరిశీలిస్తూ పనులను వేగవంతం చేశారు. ప్రజలకు ఎలాంటి ఇబ్బందులు కలగకుండా ఎస్‌ఐఆర్‌ ప్రక్రియను గడువులోగా పూర్తి చేయాలనే లక్ష్యంతో రెవెన్యూ అధికారులు, సిబ్బంది సమన్వయంతో పనిచేస్తున్నారని స్థానికులు తెలిపారు.