విద్యుత్‌ కోతలతో రైతుల పంటలు ఎండిపోతున్నా ప్రభుత్వం పట్టించుకోవడం లేదంటూ ఆరోపిస్తూ తెలంగాణ తెలుగుదేశం పార్టీ ఆధ్వర్యంలో రైతులు తీవ్ర ఆగ్రహం వ్యక్తం చేశారు. గురువారం కోదాడ సబ్‌స్టేషన్‌ ఎదుట రైతులకు 24 గంటల నాణ్యమైన విద్యుత్‌ సరఫరా చేయాలని డిమాండ్‌ చేస్తూ మహాధర్నా నిర్వహించారు.వ్యవసాయానికి విద్యుత్‌ సరఫరాలో తరచూ అంతరాయాలు ఏర్పడటంతో పొలాల్లో వరి పంటలు ఎండిపోతున్నాయని రైతులు ఆవేదన వ్యక్తం చేశారు. పంట చేతికొచ్చే దశలో విద్యుత్‌ కోతలతో రైతులను నష్టాలపాలు చేయడం ఎంతవరకు సమంజసమని ప్రభుత్వాన్ని ప్రశ్నించారు. రైతుల సమస్యలను తక్షణమే పరిష్కరించకుండా కాలయాపన చేస్తే ఆందోళనలను మరింత ఉధృతం చేస్తామని టీడీపీ నాయకులు హెచ్చరించారు.అనంతరం ఏఈ, ఏడీ అధికారులను కలిసి వినతిపత్రం అందజేశారు. ఎండిపోతున్న పంటలను కాపాడేందుకు తక్షణమే విద్యుత్‌ సరఫరాను క్రమబద్ధీకరించాలని, రైతులకు న్యాయం చేయాలని కోరారు. సమస్యను వెంటనే పరిష్కరించకపోతే రైతులతో కలిసి పెద్ద ఎత్తున ఉద్యమిస్తామని టీడీపీ నాయకులు స్పష్టం చేశారు.