రామన్నపేట: తెలంగాణ రికగ్నైజ్డ్ స్కూల్స్ మేనేజ్‌మెంట్ అసోసియేషన్ (ట్రస్మా) రామన్నపేట మండల నూతన కమిటీని గురువారం జరిగిన సమావేశంలో ఏకగ్రీవంగా ఎన్నుకున్నారు. ట్రస్మా జిల్లా అధ్యక్షుడు పాలకుర్ల వెంకటేశం సమక్షంలో నిర్వహించిన సమావేశంలో నూతన కార్యవర్గాన్ని ప్రకటించారు.

మండల కమిటీ గౌరవ సలహాదారుగా తిరుగుల మల్లికార్జున్ (వివేకానంద స్కూల్), గౌరవ అధ్యక్షుడిగా గంగుల నరేందర్‌రెడ్డి (కృష్ణవేణి టాలెంట్ స్కూల్), అధ్యక్షుడిగా జె.ఎస్. మార్టిన్ (మదర్ థెరిసా స్కూల్), వర్కింగ్ ప్రెసిడెంట్‌గా కనకాచారి (చైతన్య విద్యాలయం, ఇంద్రపాలనగరం), ప్రధాన కార్యదర్శిగా నకిరేకంటి నాగరాజు (నాగార్జున స్కూల్), కోశాధికారిగా కె. శ్రీధర్ (పల్లవి స్కూల్) ఏకగ్రీవంగా ఎన్నికయ్యారు.

అనంతరం నూతన కమిటీ సభ్యులను శాలువాలు, పూలమాలలతో ఘనంగా సన్మానించారు. ప్రైవేట్ పాఠశాలల సమస్యల పరిష్కారానికి, విద్యా ప్రమాణాల పెంపునకు నూతన కమిటీ సమన్వయంతో పనిచేయాలని పలువురు ఆకాంక్షించారు.

కార్యక్రమంలో ట్రస్మా జిల్లా ప్రధాన కార్యదర్శి దాసరి శ్రీరాములు, జిల్లా గౌరవ అధ్యక్షుడు మెరుగు మధు, జిల్లా నాయకులు మిర్యాల దుర్గాప్రసాద్, కాసుల వెంకటేశం తదితరులు పాల్గొన్నారు.