నల్గొండ జిల్లా నకిరేకల్ నియోజకవర్గంలో కాంగ్రెస్ ప్రభుత్వ తీరుతో పాటు పోలీసు అధికారుల వ్యవహారశైలిపై బీఆర్ఎస్ మాజీ ఎమ్మెల్యే చిరుమర్తి లింగయ్య తీవ్ర స్థాయిలో విమర్శలు గుప్పించారు. బుధవారం నకిరేకల్ పట్టణంలో పార్టీ నాయకులతో కలిసి నిర్వహించిన విలేకరుల సమావేశంలో ఆయన మాట్లాడారు.గత ఏడాది పంపిణీ చేయాల్సిన బతుకమ్మ చీరలను ఏడాది ఆలస్యంగా పంపిణీ చేయడం ప్రభుత్వ వైఫల్యానికి నిదర్శనమని విమర్శించారు. మహిళలకు అందజేస్తున్న చీరల్లో నాణ్యత లోపించిందని, ఒకే నమూనాలో ఉండటంతో అవి యూనిఫాంలా కనిపిస్తున్నాయని మహిళలే ఆవేదన వ్యక్తం చేస్తున్నారని పేర్కొన్నారు.

నకిరేకల్ నియోజకవర్గంలోని పోలీసు అధికారుల పనితీరుపైనా చిరుమర్తి తీవ్ర అసంతృప్తి వ్యక్తం చేశారు. సీఐలు, ఎస్ఐలు అధికార పార్టీకి అనుకూలంగా వ్యవహరిస్తూ బీఆర్ఎస్ కార్యకర్తలు, సర్పంచులు, మాజీ సర్పంచులపై కక్షపూరితంగా వ్యవహరిస్తున్నారని ఆరోపించారు. ఈ వ్యవహారంపై జిల్లా ఎస్పీ, డీఎస్పీలు ప్రత్యేక దృష్టి సారించాలని కోరారు.

పోలీసులు రాజకీయాలకు అతీతంగా నిష్పక్షపాతంగా విధులు నిర్వర్తించాలని సూచించిన ఆయన, లేకపోతే భవిష్యత్తులో బీఆర్ఎస్ అధికారంలోకి వచ్చిన తర్వాత తగిన చర్యలు తప్పవని హెచ్చరించారు. పోలీసులు ప్రజలతో మాట్లాడే భాష, ఉపయోగిస్తున్న పదజాలాన్ని వెంటనే మార్చుకోవాలని సూచిస్తూ, రాష్ట్ర డీజీపీ కూడా నకిరేకల్ పరిస్థితులపై ప్రత్యేక దృష్టి పెట్టాలని విజ్ఞప్తి చేశారు.