ఫైర్ స్టేషన్‌ను తుంగతుర్తిలోనే ఏర్పాటు చేయాలి:

తాటికొండ సీతయ్య

నియోజకవర్గ కేంద్రానికి ప్రాధాన్యం ఇవ్వాలని డిమాండ్

లేదంటే తుంగతుర్తి అభివృద్ధి మరింత వెనుకబడుతుందని ఆందోళన

తుంగతుర్తి, జూలై తుంగతుర్తి నియోజకవర్గానికి మంజూరైన ఫైర్ స్టేషన్‌ను తప్పనిసరిగా తుంగతుర్తి పట్టణంలోనే ఏర్పాటు చేయాలని బీఆర్ఎస్ మండల అధ్యక్షులు, మాజీ ఎంపీపీ తాటికొండ సీతయ్య డిమాండ్ చేశారు. ఎంతోకాలంగా ప్రజలు ఎదురుచూస్తున్న ఫైర్ స్టేషన్ మంజూరు కావడం సంతోషకరమైన విషయమని, అయితే దానిని నియోజకవర్గ కేంద్రం కాకుండా వేరే ప్రాంతానికి తరలిస్తే తుంగతుర్తి అభివృద్ధికి తీవ్ర నష్టం జరుగుతుందని అన్నారు.తుంగతుర్తి నియోజకవర్గ కేంద్రం కావడంతో పాటు చుట్టుపక్కల ఉన్న అన్ని మండలాలకు కేంద్ర బిందువుగా ఉందని ఆయన పేర్కొన్నారు. గతంలో కూడా తుంగతుర్తిలో ఏర్పాటు కావాల్సిన మార్కెట్ యార్డును అప్పటి కాంగ్రెస్ ప్రభుత్వం వేరే ప్రాంతానికి తరలించడం వల్ల మండల అభివృద్ధి వెనుకబడిందని గుర్తు చేశారు.అదే విధంగా ప్రస్తుతం ఫైర్ స్టేషన్‌ను తిరుమలగిరికి మార్చే ప్రయత్నాలు జరిగితే తుంగతుర్తి అభివృద్ధి మరింత వెనుకబడే ప్రమాదం ఉందని ఆందోళన వ్యక్తం చేశారు.స్థానిక ఎమ్మెల్యే మందుల సామేల్ వెంటనే స్పందించి ఫైర్ స్టేషన్‌ను తుంగతుర్తి నియోజకవర్గ కేంద్రంలోనే ఏర్పాటు చేసేలా చర్యలు తీసుకోవాలని తాటికొండ సీతయ్య డిమాండ్ చేశారు.ఈ కార్యక్రమంలో బీఆర్ఎస్ జిల్లా నాయకులు గుండగాని రాములు గౌడ్, మండల నాయకులు తునికి సాయిలు, పోలేపాక సోమయ్య తదితరులు పాల్గొన్నారు.