కాళేశ్వరం వైఫల్యాలకు బీఆర్ఎస్ బాధ్యత వహించాలి..

కేసుకు స్టే వస్తే గెలిచినట్లు గోబెల్స్ ప్రచారం పై ప్రభుత్వ విప్ వేముల వీరేశం ధ్వజం..

నకిరేకల్ : కాళేశ్వరం ప్రాజెక్టులో జరిగిన భారీ అవినీతి, నిర్మాణ లోపాలు ఎక్కడ బయటపడతాయోనన్న భయంతోనే బీఆర్ఎస్ నాయకులు కోర్టులను ఆశ్రయించి స్టేలు తెచ్చుకుంటున్నారని ప్రభుత్వ విప్, నకిరేకల్ ఎమ్మెల్యే వేముల వీరేశం విమర్శించారు. బుధవారం నకిరేకల్‌లోని తన క్యాంప్ కార్యాలయంలో ఏర్పాటు చేసిన విలేకరుల సమావేశంలో ఆయన మాట్లాడారు. ప్రాజెక్టు వైఫల్యాలపై నిజాలు నిగ్గు తేల్చేందుకు నియమించిన పీసీ ఘోష్ కమిషన్‌ను మొదటి నుంచీ బీఆర్ఎస్ అడ్డుకుంటోందని, తమ తప్పులు ఎక్కడ దొరికిపోతాయోనన్న ఆందోళన వారిలో స్పష్టంగా కనిపిస్తోందని మండిపడ్డారు.​ కోర్టు తీర్పును బీఆర్ఎస్ నాయకులు తమకు అనుకూలంగా వక్రీకరించుకుంటూ తప్పుడు ప్రచారం చేస్తున్నారని వీరేశం ధ్వజమెత్తారు.

పీసీ ఘోష్ కమిషన్ ఇచ్చిన నివేదిక ఆధారంగా కొన్ని సాంకేతిక అంశాలపై మాత్రమే చర్యలు తీసుకోవద్దని హైకోర్టు సూచించిందని అంతేకానీ కేసు మొత్తం గెలిచినట్లు కాదని ఆయన స్పష్టం చేశారు. స్టేలు తెచ్చుకుని తాము నిర్దోషులమని చెప్పుకోవడం అంటే తెలంగాణ ప్రజలను మరోసారి మోసం చేయడమేనని అసలు దొంగలెవరో రాష్ట్ర ప్రజలందరూ గమనిస్తున్నారని ఎద్దేవా చేశారు. కాళేశ్వరం ప్రాజెక్టులో జరిగిన నాణ్యత లోపాల కారణంగా వేలాది కోట్ల రూపాయల ప్రజాధనం వృథా అయ్యిందని, దీనికి పూర్తి బాధ్యత గత ప్రభుత్వానిదేనని ఆయన పేర్కొన్నారు. ఈ కుంభకోణంపై సమగ్ర విచారణ జరిపేందుకు ప్రభుత్వం సిద్ధంగా ఉందని అవసరమైతే సీబీఐ దర్యాప్తు కూడా చేపడుతుందని స్పష్టం చేశారు. ఈ అవినీతిలో ఎవరెవరి పాత్ర ఉందో వారందరిపై కఠిన చర్యలు తీసుకుంటామని హెచ్చరించారు. గతంలో ప్రధాని మోదీ, అమిత్ షా వంటి వారు సైతం కాళేశ్వరాన్ని ఏటీఎంలా వాడుకున్నారని విమర్శించిన విషయాన్ని ఆయన ఈ సందర్భంగా గుర్తు చేశారు. ఈ వ్యవహారంపై కేంద్ర ప్రభుత్వం కూడా తమ వైఖరిని స్పష్టంగా తెలియజేయాల్సిన అవసరం ఉందని కోరారు. పదేళ్లపాటు అధికారంలో ఉండి దోచుకున్న బీఆర్ఎస్ జిల్లా నాయకులు ఇప్పుడు అహంకారంతో మాట్లాడటం విడ్డూరంగా ఉందని వీరేశం విమర్శించారు. సూర్యాపేట మున్సిపల్ ఎన్నికల్లో ప్రజలు ఇచ్చిన తీర్పుతోనైనా అక్కడి నాయకులకు జ్ఞానోదయం కావాల్సిందని కానీ వారి ప్రవర్తనలో మార్పు రావడం లేదని అన్నారు. కేవలం కమిషన్ల కోసమే ప్రాజెక్టులు కట్టి ప్రజల సొమ్మును దోచుకున్నారనేది తెలంగాణ సమాజం మొత్తం నమ్ముతోందని నిజాలు వెలుగులోకి వచ్చే వరకు తమ ప్రభుత్వం విశ్రమించబోదని ఆయన తేల్చి చెప్పారు.