అమెరికా సామ్రాజ్యవాద విధానాలను నిరసిస్తూ భారత ప్రజాతంత్ర యువజన సమాఖ్య (డివైఎఫ్‌ఐ), భారత విద్యార్థి ఫెడరేషన్ (ఎస్‌ఎఫ్‌ఐ) ఆధ్వర్యంలో నల్లగొండలోని సుభాష్ సెంటర్ వద్ద నల్ల జెండాలతో నిరసన కార్యక్రమం చేపట్టారు.

ఈ సందర్భంగా డివైఎఫ్‌ఐ రాష్ట్ర ఉపాధ్యక్షులు మల్లం మహేష్, ఎస్‌ఎఫ్‌ఐ రాష్ట్ర ఉపాధ్యక్షులు ఖమ్మంపాటి శంకర్ మాట్లాడుతూ అమెరికా సామ్రాజ్యవాద విధానాలు ప్రపంచంలో యుద్ధాలను ప్రోత్సహిస్తూ దేశాలను వలసల పాలనలోకి నెట్టే ప్రయత్నాలు చేస్తున్నాయని ఆరోపించారు. ఇరాన్‌పై దాడులకు ఇజ్రాయిల్‌ను అమెరికా ప్రోత్సహిస్తోందని, ఈ యుద్ధాల కారణంగా వేలాది చిన్నారులు ప్రాణాలు కోల్పోతున్నారని ఆవేదన వ్యక్తం చేశారు. వెంటనే యుద్ధాలను నిలిపివేసి ప్రపంచ శాంతిని కాపాడాలని డిమాండ్ చేశారు. అలాగే మోడీ ప్రభుత్వం సామ్రాజ్యవాద శక్తులకు మొగ్గుచూపుతున్న తీరు ఖండనీయమని పేర్కొన్నారు.

ఈ కార్యక్రమంలో ఎస్‌ఎఫ్‌ఐ గర్ల్స్ రాష్ట్ర కో-కన్వీనర్ కుంచెం కావ్య, డివైఎఫ్‌ఐ జిల్లా ఉపాధ్యక్షుడు గుండాల నరేష్, ఎస్‌ఎఫ్‌ఐ డివిజన్ కార్యదర్శి మారుపాక కిరణ్, రియాజ్, మాజీ డివైఎఫ్‌ఐ నాయకులు మన్నెం బిక్షం, మహేష్, తరుణ్, లక్ష్మణ్, శివ, ఉపేందర్, సత్యనారాయణ, యాదగిరి, రఘు తదితరులు పాల్గొన్నారు.