నకిరేకల్: అంగన్వాడీ సేవలను డిజిటల్‌ పద్ధతిలో మరింత సమర్థవంతంగా నిర్వహించేందుకు చర్యలు చేపట్టారు. నకిరేకల్ నియోజకవర్గం పరిధిలోని రామన్నపేట మండలానికి చెందిన అంగన్వాడీ టీచర్లు, సూపర్‌వైజర్లకు నకిరేకల్ ఎమ్మెల్యే ప్రభుత్వ విప్ వేముల వీరేశం స్మార్ట్‌ఫోన్లు పంపిణీ చేశారు.

ఈ సందర్భంగా ఆయన మాట్లాడుతూ గర్భిణీలు, బాలింతలు, చిన్నారులకు అందించే సేవలు వేగవంతం కావడంలో ఈ మొబైల్‌ ఫోన్లు కీలక పాత్ర పోషిస్తాయని తెలిపారు. లబ్ధిదారుల వివరాల నమోదు, పథకాల అమలు, పర్యవేక్షణ వంటి కార్యక్రమాలు సులభతరం అవుతాయని పేర్కొన్నారు.

అంగన్వాడీ వ్యవస్థలో పారదర్శకత పెరగడంతో పాటు సేవల నాణ్యత మెరుగుపడుతుందని ఆశాభావం వ్యక్తం చేశారు. కార్యక్రమంలో అధికారులు, స్థానిక నాయకులు, అంగన్వాడీ సిబ్బంది పాల్గొన్నారు.